ସମାଜ ଡିଜିଟାଲ ଡେସ୍କ: ବିନା ହେଲମେଟରେ ଏବେ ପେଟ୍ରୋଲ ପମ୍ପରେ ପେଟ୍ରୋଲ ମିଳିବ ନାହିଁ। କିଛି ଏଭଳି ନିୟମ ଲାଗୁ ହୋଇଛି ଉତ୍ତରପ୍ରଦେଶର ବରେଲୀ ଜିଲାରେ। ପରିବହନ କମିଶନରଙ୍କ ନିର୍ଦ୍ଦେଶ ଅନୁଯାୟୀ ସୋମବାର ଜିଲାପାଳ ରବିନ୍ଦ୍ର କୁମାର ବରେଲୀ ଜିଲାରେ ସରକାରଙ୍କ ‘ନୋ ହେଲମେଟ-ନୋ ଫୁଏଲ’ ନୀତିକୁ କଡ଼ାକଡ଼ି ଭାବେ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଛନ୍ତି।
ସମସ୍ତ ପେଟ୍ରୋଲ ପମ୍ପ ପରିଚାଳକଙ୍କୁ ନିର୍ଦ୍ଦେଶ ଦିଆଯାଇଛି ଯେ, ଚାଳକଙ୍କ ସମେତ ପଛରେ ବସିଥିବା ବ୍ୟକ୍ତି ଯଦି ହେଲମେଟ ପିନ୍ଧି ନଥିବେ ତେବେ ସେହି ଦୁଇ ଚକିଆ ଯାନକୁ ମଧ୍ୟ ପେଟ୍ରୋଲ ଦେବନାହିଁ। ସଡ଼କ ଦୁର୍ଘଟଣାଜନିତ ମୃତ୍ୟୁ କ୍ଷେତ୍ରରେ ବରେଲୀ ରାଜ୍ୟର ଶ୍ରେଷ୍ଠ ୨୦ ଜିଲାରେ ସାମିଲ। ଅନେକ ଅଭିଯାନ ଏବଂ କାର୍ଯ୍ୟାନୁଷ୍ଠାନ ପରେ ମଧ୍ୟ ଜିଲାର ଲୋକମାନେ ହେଲମେଟ ବ୍ୟବହାର କରୁନାହାନ୍ତି। ଦୁଇ ଚକିଆ ଯାନରେ ଘଟୁଥିବା ଦୁର୍ଘଟଣାରେ ଅଧିକାଂଶ କ୍ଷେତ୍ରରେ ହେଲମେଟ ପିନ୍ଧି ନ ଥିବା ଚାଳକଙ୍କର ମୃତ୍ୟୁ ଘଟୁଛି।
ଜିଲାପାଳ ରବିନ୍ଦ୍ର କୁମାର ସମସ୍ତ ପେଟ୍ରୋଲ ପମ୍ପ ପରିଚାଳକମାନଙ୍କୁ ନିର୍ଦେଶ ଦେଇଛନ୍ତି ଯେ, ଜାନୁଆରୀ ୨୬ ପୂର୍ବରୁ ସେମାନଙ୍କ ପେଟ୍ରୋଲ ପମ୍ପରେ ସିସିଟିଭି କ୍ୟାମେରା ଲଗାଇବାସହ ବଡ଼ ବଡ଼ ହୋର୍ଡିଙ୍ଗ୍ ମଧ୍ୟ ଲାଗାଇ ଦିଅନ୍ତୁ। ଯଦି କୌଣସି ପେଟ୍ରୋଲ ପମ୍ପ ଅପରେଟର ହେଲମେଟ ପିନ୍ଧି ନଥିବା ଦୁଇ ଚକିଆ ଯାନ ଚାଳକଙ୍କୁ ଇନ୍ଧନ ଦିଅନ୍ତି, ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ଚେତାବନୀ ଦେଇଛନ୍ତି।
