ସଡ଼କ ଦୁର୍ଘଟଣାରେ ୨ ଗୁରୁତର

ଯାଜପୁର : ସୋମବାର ଯାଜପୁରର ବିଞ୍ଝାରପୁର ଥାନା ଅଞ୍ଚଳ ତାଉଁତରା ଛକ ନିକଟରେ ଏକ ସଡ଼କ ଦୁର୍ଘଟଣା ଘଟିଛି। ଏକ ସ୍କୁଟର ଧକ୍କା ଦେବାରୁ ପ୍ରାଥମିକ ବିଦ୍ୟାଳୟରେ ପଢୁଥିବା ଜଣେ ଛାତ୍ର ଓ ଛାତ୍ରୀ ଗୁରୁତର ଆହତ ହୋଇଛନ୍ତି। ଛାତ୍ରଛାତ୍ରୀ ଦୁହେଁ ସଂପର୍କରେ ଭାଇଭଉଣୀ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ଉଭୟ ଭାଇଭଉଣୀ ଚାଲି ଚାଲି ବିଦ୍ୟାଳୟ ଯାଉଥିଲେ। ସେହି ସମୟରେ ଏକ ସ୍କୁଟରରେ ଯାଉଥିବା ଜଣେ ଛାତ୍ରୀଙ୍କୁ ଅନ୍ୟ ଜଣେ ମୋଟର ସାଇକେଲ ଆରୋହୀ ସାଇଡ଼ ମାରିଥିଲେ। ଫଳରେ କଲେଜ ଛାତ୍ରୀ ଜଣକ ଭାରସାମ୍ୟ ହରାଇ ଭାଇଭଉଣୀଙ୍କୁ ଧକ୍କା ଦେଇଥିଲେ। ଏହି ଘଟଣା ପରେ ଉଭୟ ବାଇକ ଆରୋହୀ ଓ ସ୍କୁଟର ଚଲାଉଥିବା ଛାତ୍ରୀ ଫେରାର ହୋଇଯାଇଛନ୍ତି। ସେମାନଙ୍କ ପରିଚୟ ମିଳିପାରି ନାହିଁ। ସ୍ଥାନୀୟ ଲୋକମାନେ ଗୁରୁତର ଭାଇଭଉଣୀଙ୍କୁ ପ୍ରଥମେ ଯାଜପୁର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ମାତ୍ର ଦୁହିଁଙ୍କ ଅବସ୍ଥା ଗୁରୁତର ହେବାରୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚିଛି। ଘଟଣାସ୍ଥଳରେ ଉତ୍ତେଜନା ଲାଗି ରହିଥିବା ଜଣାପଡ଼ିଛି।