ନୂଆଦିଲ୍ଳୀ: ଲୋକାର୍ପଣ ଅପେକ୍ଷାରେ ଥିବା ଟ୍ରେନ୍ ୧୮ର ଟିକେଟ୍ ମୂଲ୍ୟ ଶତାବ୍ଦୀ ଏକ୍ସପ୍ରେସର ଟିକେଟ ମୂଲ୍ୟଠାରୁ ମଧ୍ୟ ଅଧିକ ହେବ। ସ୍ୱଦେଶୀ ଜ୍ଞାନକୌଶଳରେ ନିର୍ମିତ ବୁଲେଟ୍ ଟ୍ରେନ୍ ୧୮ର ପରୀକ୍ଷଣ ସରିଯାଇଥିବା ବେଳେ ଲୋକାର୍ପଣ ପାଇଁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ସମୟ ମଗାଯାଇଥିବା ଜଣାପଡ଼ିଛି। ବଜେଟ୍ ଅଧିବେଶନ ପରେ ପ୍ରଧାନମନ୍ତ୍ରୀ ଏହାର ଲୋକାର୍ପଣ କରିବାର କାର୍ଯ୍ୟକ୍ରମ ରହିଛି। ପ୍ରାଥମିକ ପର୍ଯ୍ୟାୟରେ ନୂଆଦିଲ୍ଳୀରୁ ବାରାଣସୀକୁ ଏହି ଟ୍ରେନ ଚଳାଚଳ କରିବା ପାଇଁ କାର୍ଯ୍ୟକ୍ରମ ସ୍ଥିର ହୋଇଛି। ୭୫୫ କିମି ବିଶିଷ୍ଟ ଏହି ଦୂରତାକୁ ଟ୍ରେନ୍ ୧୮ ମାତ୍ର ୮ ଘଣ୍ଟା ମଧ୍ୟରେ ଅତିକ୍ରମ କରିବ। ଟ୍ରେନ୍ର ଏକ୍ସିକ୍ୟୁଟିଭ୍ ଓ ଚେୟାର କ୍ଲାସର ଟିକେଟ୍ ମୂଲ୍ୟ ୨,୮୦୦ ରୁ ୨,୯୦୦ ଟଙ୍କା ମଧ୍ୟରେ ହେବ। ଏବେ ଦେଶର ସବୁଠାରୁ ମହଙ୍ଗା ଟ୍ରେନ୍ ଭାବେ ପରିଗଣିତ ଶତାବ୍ଦୀ ଏକ୍ସପ୍ରେସର ଟିକେଟ୍ ମୂଲ୍ୟ ତୁଳନାରେ ଏହା ୫୦% ଅଧିକ। ଚେନ୍ନାଇ ସ୍ଥିତ ଇଣ୍ଟିଗ୍ରାଲ୍ କୋଚ୍ ଫ୍ୟାକ୍ଟ୍ରି ଦ୍ୱାରା ନିର୍ମିତ ଏହି ଇଞ୍ଜିନ ବିହୀନ ଟ୍ରେନ୍ ଲକ୍ଷେ୍ନø ସ୍ଥିତ ରିସର୍ଚ୍ଚ ଡିଜାଇନ୍ ଆଣ୍ଡ ଷ୍ଟାଣ୍ଡାର୍ଡ ଅର୍ଗାନାଇଜେସନ୍ ଦ୍ୱାରା ପରୀକ୍ଷଣ କରାଯାଇଛି। ଘଣ୍ଟାକୁ ସର୍ବାଧିକ ୨୦୦ କିମି ବେଗରେ ଯାତ୍ରା କରିପାରୁଥିବା ଏହି ଟ୍ରେନ୍ରେ ବାୟୋ ଟଏଲଟ୍, ୱାଇଫାଇ, ଜିପିଏସ୍ ସିଷ୍ଟମ ସହିତ ଯାତ୍ରୀଙ୍କ ପାଇଁ ସମସ୍ତ ପ୍ରକାର ଅତ୍ୟାଧୁନିକ ବ୍ୟବସ୍ଥା ରହିଛି।
