ଖରାପ ସମୟରେ ରୁଷ ତା’ର ବନ୍ଧୁମାନଙ୍କ ହାତ ଛାଡ଼େନାହିଁ, ଆମେରିକା ଓ ଆମ ଭିତରେ ଏହି ଅନ୍ତର ରହିଛି: ମସ୍କୋ

ସମାଜ ଡିଜିଟାଲ ଡେସ୍କ: ସିରିୟାରେ ଶାସନର ପରିବର୍ତ୍ତନ ପରେ ରାଷ୍ଟ୍ରପତି ବଶର ଅଲ ଅସଦ ଦେଶ ଛାଡ଼ି ପଳାଇଛନ୍ତି। ଏହି ସମୟରେ ରୁଷ ତାଙ୍କୁ ଏବଂ ତାଙ୍କ ପରିବାରକୁ ଶରଣ ଦେଇଛି। ମାନବୀୟ ଆଧାରରେ ଅସଦଙ୍କ ଶରଣ ଦିଆଯାଇଛି। ରୁଷ ରାଷ୍ଟ୍ରଦୂତ ମିଖାଇଲ ଉଲ୍ୟାନୋଭ କହିଛନ୍ତି, ଅସଦ ଏବଂ ତାଙ୍କ ପରିବାର ମସ୍କୋରେ ଅଛନ୍ତି। ରୁଷ ଖରାପ ସମୟରେ ନିଜ ବନ୍ଧୁମାନଙ୍କୁ ଧୋକା ଦିଏନାହିଁ। ଏହା ହେଉଛି ରୁଷ ଏବଂ ଆମେରିକା ମଧ୍ୟରେ ଅନ୍ତର।

ସିରିୟାରେ ଗତ ୧୧ ଦିନ ଧରି ବିଦ୍ରୋହୀ ହାୟାତ ତାହରିର ଅଲ ସାମ୍‌ ସଂଗଠନ ଏବଂ ସେନା ମଧ୍ୟରେ ଯୁଦ୍ଧ ଜାରି ରହିଥିଲା। ବିଦ୍ରୋହୀମାନେ ରବିବାର ରାଜଧାନୀ ଦାମାସ୍କସକୁ ନିଜ କବଜାକୁ ନେବା ସହିତ ରାଷ୍ଟ୍ରପତିଙ୍କ ବାସଭବନରେ ପଶି ଭଙ୍ଗାରୁଜା କରିଥିଲେ। ରାଷ୍ଟ୍ରପତି ଅସଦ ନିଜ ଜୀବନ ବଞ୍ଚାଇ ଦେଶ ଛାଡ଼ି ସପରିବାର ପଳାୟନ କରିଥିଲେ।