ନୂଆଦିଲ୍ଲୀ : ଗ୍ବାଲିୟର ସିଟି ଥାନା ଅଞ୍ଚଳ ଗୋପାଳ ବାଗରେ ଗୁରୁବାର ରାତିରେ ୨ ଜଣ ଦୁର୍ବୃତ୍ତ ଜଣଙ୍କୁ ଗୁଳି କରି ହତ୍ୟା କରିଛନ୍ତି । ଆକ୍ରମଣକାରୀ ଗୁଳି ଚଳାଇ ୨୦ ସେକେଣ୍ଡରେ ହତ୍ୟା କରି ଫେରାର ହୋଇଯାଇଛନ୍ତି । ଏହି ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଯାଇଛି । ମୃତକ ପାରୋଲରେ ବାହାରକୁ ଆସିଥିଲେ । ଏକ ହତ୍ୟା ମାମଲାରେ ସେ ଆଜୀବନ କାରାଦଣ୍ଡ ଭୋଗୁଥିଲେ ।
- Advertisement -
ଡବରାର ଗୋପାଳ ବାଗ ସିଟିରେ ରହୁଥିବା ଜସବନ୍ତ ସିଂହ ଚିନୋର ଅଞ୍ଚଳର ଅଧିବାସୀ । ସେ ୧୦ ଦିନ ପୂର୍ବରୁ ପାରୋଲରେ ଆସିଥିଲେ । ପ୍ରତିଦିନ ଭଳି ସେ ରାତିରେ ଖାଇସାରିବା ପରେ କଲୋନୀରେ ବୁଲୁଥିଲେ । ଗୁରୁବାର ରାତିରେ ସେ ବୁଲୁଥିବା ସମୟରେ ଅଚାନକ ବାଇକରେ ୨ ଜଣ ଆସି ତାଙ୍କ ଉପରକୁ ଗୁଳି ଚଳାଇଥିଲେ । ଏଥିରେ ତାଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଗୁଳି ଶବ୍ଦ ଶୁଣି ସବୁ ଲୋକ ଏକାଠି ହୋଇଯାଇଥିଲେ କିନ୍ତୁ ଦୁର୍ବୃତ୍ତ ଫେରାର ହୋଇଯାଇଥିଲେ । ପୁଲିସ ସିସିଟିଭି ଆଧାରରେ ଖୋଳତାଡ କରୁଛି ।
