କେନ୍ଦୁଝରଗଡ଼: ୧୪ ଓ ୧୭ବର୍ଷରୁ କମ୍ ବାଳକ ଓ ବାଳିକାବର୍ଗର ରାଜ୍ୟସ୍ତରୀୟ ଖେଳ଼କୁଦ ପ୍ରତିଯୋଗୀତା ଚଳିତମାସ ୧୦ରୁ ୧୩ ତାରିଖ ପର୍ଯ୍ୟନ୍ତ ୪ ଦିନ ବ୍ୟାପୀ କେନ୍ଦୁଝର ସହର ଉପକଣ୍ଠ ଶଙ୍କରପୁରସ୍ଥିତ ଧରଣୀଧର କ୍ରୀଡା କମ୍ପେ୍ଲକ୍ସରେ ଆରମ୍ଭ ହେବାକୁ ଯାଉଛି। ଏହି ରାଜ୍ୟସ୍ତରୀୟ ଖେଳକୁଦ ପ୍ରତିଯୋଗିତାରେ ୩୦ଟି ଜିଲା ସମେତ ଭୁବନେଶ୍ୱର କଳିଙ୍ଗ ଷ୍ଟାଡିୟମ କ୍ରୀଡ଼ା ଦଳକୁ ମିଶାଇ ପ୍ରାୟ ୯୦୦ରୁ ଅଧିକ ଖେଳାଳି ଏବଂ ୨୦୦ରୁ ଅଧିକ ଦଳ ପରିଚାଳକ, ପ୍ରଶିକ୍ଷକ, ରାଜ୍ୟ ତଥା ଜିଲାସ୍ତରୀୟ ଅଧିକାରୀ ବୃନ୍ଦ ସାମିଲ ହେବେ। ୧୦୦ମି., ୨୦୦ମି., ୪୦୦ମି., ୬୦୦ମି., ୮୦୦ମି., ୧୫୦୦ମି., ୩୦୦୦ମି. ଦୌଡ, ଲମ୍ବ ଡିଆଁ, ଉଚ୍ଚ ଡିଆଁ, ଟ୍ରିପଲ୍ ଡିଆଁ, ସର୍ଟ ପୁଟ, ଡିସ୍କସ୍ ଥ୍ରୋ, ଜାଭେଲିନ ଥ୍ରୋ, ହାମର ଥ୍ରୋ ଆଦି ପ୍ରତିଯୋଗିତାରେ ଖେଳାଳିମାନେ ଅଂଶଗ୍ରହଣ କରିବେ।
ଉଦଘାଟନୀ ଉତ୍ସବରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ମୁଖ୍ୟଅତିଥି, କେନ୍ଦୁଝର ସାଂସଦ ଅନନ୍ତ ନାଏକଙ୍କ ସମେତ ଜିଲାର ସମସ୍ତ ବିଧାୟକ, ଜିଲାପାଳ ଏବଂ ଆରକ୍ଷୀ ଅଧିକ୍ଷକ ସମ୍ମାନିତ ଅତିଥି ଭାବେ ଯୋଗଦେବେ ବୋଲି ଜିଲା ଶିକ୍ଷା ଅଧିକାରୀ ଗୌରୀରାଣୀ ନାଏକ ଏହା କହିଛନ୍ତି। ଏହି ରାଜ୍ୟସ୍ତରୀୟ ଖେଳ଼କୁଦ ପ୍ରତିଯୋଗିତାର ବ୍ୟାପକ ପ୍ରଚାର ପ୍ରସାର ଉପଲକ୍ଷେ ଆସନ୍ତା ୯ ତାରିଖ ଶନିବାର ସକାଳ ୭ ଘଟିକା ସମୟରେ ଜିଲାପାଳଙ୍କ କାର୍ଯ୍ୟାଳୟ ଠାରୁ ଜିଲା ଶିକ୍ଷା ବିଭାଗ ଅଧିକାରୀବୃନ୍ଦ, ପ୍ରଧାନଶିକ୍ଷକ-ଶିକ୍ଷୟିତ୍ରୀ, କ୍ରୀଡ଼ା ଶିକ୍ଷକ ଶିକ୍ଷୟିତ୍ରୀଙ୍କ ସମେତ ସହକାରୀ ଶିକ୍ଷକ ଶିକ୍ଷୟିତ୍ରୀମାନଙ୍କୁ ନେଇ ଏକ ଗଣଦୌଡ଼ ସହର ପରିକ୍ରମା ଅନୁଷ୍ଠିତ ହେବା ସ୍ଥିରୀକୃତ ହୋଇଛି। ରାଜ୍ୟସ୍ତରୀୟ ଖେଳକୁଦ ପ୍ରତିଯୋଗିତାର କୃତୀ ପ୍ରତିଯୋଗୀଗଣ ଉତ୍ତରପ୍ରଦେଶର ଲକ୍ଷେ୍ନାସ୍ଥିତ ଗୁରୁଗୋବିନ୍ଦ ସିଂ ସ୍ପୋର୍ଟସ କଲେଜରେ ନଭେମ୍ବର ୨୫ରୁ ୩୦ ତାରିଖ ପର୍ଯ୍ୟନ୍ତ ହେବାକୁ ଥିବା ଜାତୀୟ ଖେଳ଼କୁଦ ପ୍ରତିଯୋଗିତାରେ ଅଂଶଗ୍ରହଣ କରିବେ।
