କେନ୍ଦୁଝରଗଡ଼: ନାଳକୁ ପାଣି ପାଇଁ ଯାଇଥିବା ଜଣେ ୧୭ବର୍ଷର ନାବାଳିକାକୁ ଏକାକୀ ପାଇ ଦୁଷ୍କର୍ମ କରିଥିବା ଅଭିଯୁକ୍ତକୁ ଫାଷ୍ଟ ଟ୍ରାକ୍ କୋର୍ଟ କେନ୍ଦୁଝରର ବିଚାରପତି ଦୋଷୀ ସାବ୍ୟସ୍ତ କରି ୨୦ବର୍ଷ ସଶ୍ରମ କାରାଦଣ୍ଡାଦେଶ କରିଛନ୍ତି। ତେଲକୋଇ ଥାନା ଆଲୁଣି ଗ୍ରାମର ବାରିଆଳ ମାରାଣ୍ଡି (୩୦) ନିକଟସ୍ଥ ନାଳରୁ ପାଣି ସଂଗ୍ରହ କରି ଘରକୁ ଫେରୁଥିବା ୧୭ବର୍ଷର ନାବାଳିକାକୁ ଏକାକୀ ପାଇ ବଳପୂର୍ବକ ଦୁଷ୍କର୍ମ କରିଥିଲା। ଘଟଣା ସମ୍ପର୍କରେ ପୀଡିତା ଭୟରେ ପରିବାର ଲୋକଙ୍କୁ ଜଣାଇ ନଥିବା ବେଳେ ୫ମାସର ଗର୍ଭବତୀ ହେବାପରେ ପରିବାର ଲୋକେ ପୀଡିତାକୁ ପଚରାଉଚୁରା କରିବାରୁ ଘଟଣା ସମ୍ପର୍କରେ ପ୍ରକାଶ କରିଥିଲା। ଏ ସମ୍ପର୍କରେ ପୀଡିତାର ମା’ ତେଲକୋଇ ଥାନାରେ ୧୬ ନଭେମ୍ବର ୨୦୨୨ରେ ଅଭିଯୋଗ କରିବା ପରେ ପୁଲିସ ପକ୍ଷରୁ ଅଭିଯୁକ୍ତ ବାରିଆଳକୁ ଗିରଫ କରି କୋର୍ଟ ଚାଲାଣ କରାଯାଇଥିଲା। ଏହି ମାମଲାରେ ମୋଟ ୧୬ଜଣ ସାକ୍ଷୀୟଙ୍କ ବୟାନ ଓ ତଥ୍ୟକୁ ଭିତ୍ତିକରି ଫାଷ୍ଟ ଟ୍ରାକ୍ କୋର୍ଟ କେନ୍ଦୁଝରର ବିଚାରପତି ବିଜୟ କୁମାର ମିଶ୍ର ଅଭିଯୁକ୍ତ ବାରିଆଳକୁ ଦୋଷୀ ସାବ୍ୟସ୍ତ କରି ୨୦ବର୍ଷ ସଶ୍ରମ କାରାଦଣ୍ଡ ସହ ୨୦ହଜାର ଟଙ୍କା ଜୋରିମାନା ଏବଂ ଜୋରିମାନା ଅନାଦେୟ ଅଧିକ ୬ମାସ ସଶ୍ରମ କାରାଦଣ୍ଡ ଭୋଗିବାକୁ ଆଦେଶ କରିଛନ୍ତି। ଇତିମଧ୍ୟରେ ପୀଡିତା ଏକ ଶିଶୁକୁ ଜନ୍ମ ଦେଇଥିବାରୁ ପୀଡିତା ଓ ଶିଶୁର ଲାଳନପାଳନ ପାଇଁ ୧୨ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ରାଶି ପ୍ରଦାନ ନିମନ୍ତେ ବିଚାରପତି ତାଙ୍କ ରାୟରେ ଆଦେଶ କରିଛନ୍ତି। ପୀଡିତାଙ୍କ ପକ୍ଷରୁ ସ୍ପେଶାଲ ପି.ପି. ଜ୍ଞାନେନ୍ଦ୍ରନାଥ ଜେନା ମକଦ୍ଦମା ପରିଚାଳନା କରୁଥିଲେ।
Popular Categories
Previous article
Next article