ଆରଡି: ବାତ୍ୟା ‘ଦାନା’ ଉପକୂଳବର୍ତ୍ତୀ ଅଞ୍ଚଳ ତଥା ଭଦ୍ରକ ତଳିଆ ଅଞ୍ଚଳ ଭାବେ ପରିଚିତ ଆରଡି, ଓଳଗ, ସୁନ୍ଦରପୁର, ନାନ୍ଦପୁର ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟାଇଛି। ବିଶେଷକରି ନଦୀକୂଳିଆ ଅଞ୍ଚଳରେ ଛପର ଘର ଉଡାଇ ନେଇଥିବା ବେଳେ ଭଦ୍ରକ-ଆରଡି ମୁଖ୍ୟରାସ୍ତା ସହ ଆଖଣ୍ଡଳମଣି-ଯାଜପୁର, ଧାନକଣିଆ-ଚାନ୍ଦବାଲି ରାସ୍ତାର ଉଭୟ ପାର୍ଶ୍ବରେ ଥିବା ବହୁ ବଡବଡ ଗଛ ଉପୁଡି ପଡିଛି। ସବୁଠାରୁ ବେଶୀ କ୍ଷତି ଘଟାଇଛି ଚାଷୀମାନଙ୍କର। ଆସିଥିବା ବାତ୍ୟା ଦାନାର ଝଡ ବର୍ଷାରେ ସୁନାର ଫସଲ କ୍ଷେତରେ ଲୋଟୁଛି। ଦିନ କେଇଟା ପରେ ଚାଷୀ ତା’ର ଅମଳ ଧାନ ଘରକୁ ଆଣି ବରଷକ ପାଇଁ ଦାନା ସାଇତି ଥାଆନ୍ତା। ହେଲେ ଚାଷୀଙ୍କ ଦାନାକୁ ଛଡାଇ ନେଲା ‘ଦାନା’।
ଅନ୍ୟପଟେ ବିଜୁଳି ସେବା ଯୋଗାଇଦେବା ପାଇଁ ବିଦ୍ୟୁତ ବିଭାଗ ପକ୍ଷରୁ ଉପୁଡି ପଡିଥିବା ବିଦ୍ୟୁତ ଖୁଣ୍ଟ ମରାମତି କାର୍ଯ୍ୟ ତ୍ବରାନିତ୍ବ କରାଯାଇଥିବା ବେଳେ ସ୍ଥାନୀୟ ପୁଲିସ ପ୍ରଶାସନ ଓ ଅଗ୍ନିଶମ ବିଭାଗ ପକ୍ଷରୁ ରାସ୍ତାରୁ ଗଛ ସଫା କରାଯାଇଥିଲା। ବାତ୍ୟା ପ୍ରଭାବିତ ଅଞ୍ଚଳରେ ଜେନେରେଟର ସଂଯୋଗ କରାଯାଇ ପାନୀୟଜଳ ଯୋଗାଇ ଦିଆଯାଇଥିଲା।
