ଗୋପାଳପୁର: ସମ୍ଭାବ୍ୟ ବାତ୍ୟା ଦାନାର ପ୍ରଭାବରେ ଗଞ୍ଜାମ ଉପକୂଳରେ ପ୍ରବଳ ବର୍ଷାର ସମ୍ଭାବନା ରହିଛି। ଏଭଳି ସ୍ଥିତିରେ ଗଞ୍ଜାମ ଜିଲ୍ଲା ରଙ୍ଗେଇଲୁଣ୍ଡା ବ୍ଲକ ଅନ୍ତର୍ଗତ ମାର୍କଣ୍ଡି ଗ୍ରାମର ସମୁଦ୍ର କୂଳରେ ଥିବା ମୁହାଣରେ ବାତ୍ୟା ଜନିତ ଜୁଆର ଓ ବର୍ଷାଜଳକୁ ଆଖି ଆଗରେ ରଖି ଶତାଧିକ ମତ୍ସ୍ୟଜୀବୀ ସମୁଦ୍ର ଏବଂ ମୁହାଣ ମଝିରେ ବାଲିବସ୍ତା ପକାଇ ଅସ୍ଥାୟୀ ଆଡି ବନ୍ଧ ନିର୍ମାଣ କରିଛନ୍ତି। ମାର୍କଣ୍ଡି ସମେତ ଆଖପାଖ ୭ ଖଣ୍ଡ ଗାଁର ହଜାର ହଜାର ମତ୍ସ୍ୟଜୀବୀ ଗତ ୨ ଦିନ ହେଲା ମୁହାଣ ଅଞ୍ଚଳରେ ଆଡ଼ିବନ୍ଧ ନିର୍ମାଣରେ ଲାଗି ପଡ଼ିଛନ୍ତି। ଦୁଇ ଦିନ ତଳୁ ସାତ ଫୁଟ ଉଚ୍ଚତାର ବାଲି ବସ୍ତା ପକାଇ ବନ୍ଧ ବାନ୍ଧି ଥିଲେ କିନ୍ତୁ ଜୁଆର ମାଡି ଯୋଗୁଁଁ ଅନେକ ବାଲି ବସ୍ତା ଭାସି ଯାଇଥିଲା। ଏହା ସତ୍ତ୍ବେ ମଧ୍ୟ ଶତାଧିକ ମତ୍ସ୍ୟଜୀବୀ ଆଡ଼ିବନ୍ଧ ନିର୍ମାଣରେ ଲାଗିଛନ୍ତି।
ଆଡ଼ିବନ୍ଧ ନିର୍ମାଣ ହେଲେ ନଦୀରୁ ସମୁଦ୍ର ମଧ୍ୟକୁ ଓ ସମୁଦ୍ରରୁ ନଦୀକୁ ଡଙ୍ଗା ନେବା ଆଣିବାରେ ସହଜ ହେବ ଏବଂ ମତ୍ସ୍ୟଜୀବୀ ମାନେ ସୁବିଧାରେ ମାଛଧରା କରିପାରିବେ। ଡଙ୍ଗା ଓ ଜାଲକୁ ସୁରକ୍ଷିତ ରଖିବା ପାଇଁ ପ୍ରତିବର୍ଷ ୭ ଖଣ୍ଡ ର ଗାଁର ମତ୍ସ୍ୟଜୀବୀ ମାନେ ଚାନ୍ଦା କରି ପ୍ରାୟ ୭ ଲକ୍ଷ ଟଙ୍କା ଖର୍ଚ୍ଚ କରି ଏପରି ଆଡ଼ିବନ୍ଧ ନିର୍ମାଣ କରିଥାନ୍ତି। ଦୀର୍ଘ ବର୍ଷ ଧରି ସରକାରକୁ ବାରମ୍ବାର ଗୁହାରି କରିବା ସତ୍ୱେ ମାର୍କଣ୍ଡି ମୁହାଣରେ ସବୁଦିନିଆ ମୁହାଣ ନିର୍ମାଣ କରାଯାଇପାରିଲା ନାହିଁ। ଯାହାଫଳରେ ବର୍ଷକର କେବଳ ତିନିମାସ ମୁହାଣ ଖୋଳା ଯାଇ ମାଛ ଧରାବାକୁ ଯାଇ ହେଉଛି ବୋଲି ମତ୍ସ୍ୟଜୀବୀ କହିଛନ୍ତି। ସରକାରଙ୍କ ପକ୍ଷରୁ ପ୍ରସ୍ତାବିତ ଗୋପାଳପୁର ଓ ମାର୍କଣ୍ଡ ଠାରେ ସବୁଦିନିଆ ମୁହାଣ ବ୍ୟବସ୍ଥାକୁ ଶିଘ୍ର କରିବାକୁ ଅନେକ ମତ୍ସ୍ୟଜୀବୀ ଦାବି ଜଣାଇଛନ୍ତି।
Comments are closed.