ସମାଜ ଡିଜିଟାଲ ଡେସ୍କ: ଫ୍ରାନ୍ସର ଲିଓନଠାରେ ଅନୁଷ୍ଠିତ ୪୭ତମ ବିଶ୍ଵ ଦକ୍ଷତା ପ୍ରତିଯୋଗିତାରେ ପୁରସ୍କୃତ ୨ ଓଡ଼ିଆ ଅମରେଶ କୁମାର ସାହୁ ଏବଂ ଗେଡେଲା ଅଖିଲଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଅକ୍ଷୟ ଶକ୍ତି କ୍ଷେତ୍ରରେ ସାହୁ କାଂସ୍ୟ ପଦକ ପାଇଥିବାବେଳେ ଅଖିଲ ଜଳ ପ୍ରଯୁକ୍ତିବିଦ୍ୟା କ୍ଷେତ୍ରରେ ପଦକ ହାସଲ କରିଥିଲେ।
ମୁଖ୍ୟମନ୍ତ୍ରୀ ଉଭୟଙ୍କୁ ଶୁଭେଚ୍ଛା ଜଣାଇ କହିଥିଲେ, ଦୁଇ ଓଡ଼ିଆଙ୍କ କୃତିତ୍ଵ ଓଡ଼ିଶାକୁ ଗୌରାବାନ୍ବିତ କରିଛି। ଦକ୍ଷତା ବିକାଶ କ୍ଷେତ୍ରରେ ନେତୃତ୍ଵ ନେବାରେ ଓଡ଼ିଶାର ଯାତ୍ରା ଠିକ୍ ମାର୍ଗରେ ରହିଛି। ଉଭୟଙ୍କ ସଫଳତା ଅନ୍ୟମାନଙ୍କୁ ପ୍ରେରଣା ଯୋଗାଇବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଦେବଗଡ଼ ଜିଲାର ଅମରେଶ ସାହୁ ବର୍ତ୍ତମାନ ଭୁବନେଶ୍ଵରସ୍ଥିତ ସେଣ୍ଟ୍ରାଲ ଟୁଲ ରୁମ୍ ଆଣ୍ଡ ଟ୍ରେନିଂ ସେଣ୍ଟର(ସିଟିଟିସି)ରେ ମେକାଟ୍ରୋନିକ୍ସରେ ଡିପ୍ଲୋମା ଶିକ୍ଷା ଗ୍ରହଣ କରୁଛନ୍ତି। ସେହିପରି ଅଖିଲ ବିଟେକ୍ ଅଧ୍ୟୟନ କରୁଛନ୍ତି। ବିଶ୍ଵ ଦକ୍ଷତା ପ୍ରତିଯୋଗିତାରେ ୮୦ରୁ ଅଧିକ ଦେଶର ପ୍ରତିଯୋଗୀ ଭାଗ ନେଇଥିଲେ।
