କର୍ଣ୍ଣାଟକ: କର୍ଣ୍ଣାଟକର ଉଡୁପିରେ ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଥିବା ବେଳେ ତାହାକୁ ମରାମତି କରିବା ନେଇ କର୍ତ୍ତୃପକ୍ଷ କୌଣସି ପଦକ୍ଷେପ ଗ୍ରହଣ କରୁନଥିବା ଅଭିଯୋଗ ହେଉଛି। ଏହି ପ୍ରସଙ୍ଗକୁ ନେଇ ଏକ ଅଭିନବ ପ୍ରତିବାଦ ସ୍ବରୂପ ରାସ୍ତାରେ ଥିବା ଖାଲଖମା ଉପରେ ଲମ୍ବଡିଆଁ ପ୍ରତିଯୋଗିତା ଆୟୋଜନ କରାଉଥିବା ଏକ ଭିଡିଓ ସାମାଜିକ ଗଣମାଧ୍ୟମରେ ପ୍ରଘଟ ହୋଇଛି।
ପ୍ରଘଟ ହୋଇଥିବା ଭିଡିଓରେ ଯମରାଜ, ଚିତ୍ରଗୁପ୍ତ ଓ କେତେକ ଭୂତ ପୋଷାକ ପିନ୍ଧିଥିବା ବ୍ୟକ୍ତିଙ୍କୁ ଦେଖିବାକୁ ମିଳୁଛି। ରାସ୍ତାର ଏକ ବଡ଼ ଖାଲ ଉପରେ ଭୂତ ପୋଷାକ ପିନ୍ଧିଥିବା ବ୍ୟକ୍ତିମାନେ ଡେଉଁଥିବା ବେଳେ ଯମରାଜ ଓ ଚିତ୍ରଗୁପ୍ତ ଟେପ୍ ଧରି ଦୂରତା ମାପୁଥିବା ଦେଖିବାକୁ ମିଳୁଛି।
ରାସ୍ତାରେ ଯାଉଥିବା ଲୋକେ ଭିଡ଼ ଜମାଇ ତାହାକୁ ଦେଖୁଛନ୍ତି। ଏହି ଭିଡିଓ ସାମାଜିକ ଗଣମାଧ୍ୟମରେ ପ୍ରଘଟ ହେବା ପରେ ଏହାକୁ ବହୁସଂଖ୍ୟକ ଲୋକ ଦେଖି ସାରିଛନ୍ତି। ଯମରାଜ ଓ ଚିତ୍ରଗୁପ୍ତ ରାସ୍ତାର ଦୁରବସ୍ଥା ଯାଞ୍ଚ କରିଥିବାରୁ ଆଗାମୀଦିନରେ ଏହି ରାସ୍ତା ମରାମତି ଦିଗରେ କର୍ତ୍ତୃପକ୍ଷ ପଦକ୍ଷେପ ନେବେ ବୋଲି ବହୁବ୍ୟକ୍ତି ମନ୍ତବ୍ୟ ଦେଇଛନ୍ତି।
