ଗାଜିଆବାଦ..- ଏକ ଆପାର୍ଟମେଣ୍ଟରୁ ସୁନା ଗହଣା ସହ ଅନେକ ଅଳଙ୍କାର ଚୋରି କରି ପଳାଉଥିବା ବେଳେ ୯ ମହଲାରୁ ଖସି ପଡିବାରୁ ଏକ ଚୋରର ମୃତ୍ୟୁ ହୋଇଛି । ଦିଲ୍ଲୀ ନିକଟସ୍ଥ ଗାଜିବାଦ ଅଞ୍ଚଳରେ ଏହି ଘଟଣା ଘଟିଛି ।
ଧର୍ମେନ୍ଦ୍ର କୁମାର ନାମକ ଏହି ଚୋର ଏକ ଖେଳନା ବନ୍ଧୁକ, ଲଙ୍କା ଗୁଣ୍ଡ, ତାର କଟର , ପେଚକଷ ଓ ଟର୍ଚ ଧରି ଚୋରି କରିବା ପାଇଁ ଆପାର୍ଟମେଣ୍ଟ ମଧ୍ୟରେ ପ୍ରବେଶ କରିଥିଲା । ସେ ମଙ୍କି କ୍ୟାପ ପିନ୍ଧି ଏହି ଆପାର୍ଟମେଣ୍ଟରେ ପାଚେରୀ ଡେଇଁ ଚୋରି କରିବା ପାଇଁ ପ୍ରବେଶ କରିଥିଲା । ଚୋରି କରିବା ସମୟରେ ସୁରକ୍ଷା କର୍ମୀମାନେ ତାକୁ ଦେଖି ଦେଇଥିଲେ । ସେ ଖସିବା ପାଇଁ ରାସ୍ତା ନ ପାଇବାରୁ ଫ୍ଲାଟରେ ଥିବା ଗ୍ୟାସ ପାଇପଲାଇନ୍ ଧରି ତଳକୁ ଓହ୍ଲାଇବା ପାଇଁ ଚେଷ୍ଟା କରୁଥିଲା । ମାତ୍ର ପାଇପ ଲାଇନ୍ ଭାଙ୍ଗି ଯିବାରୁ ତଳେ ପଡି ଚୋରର ମୃତ୍ୟୁ ହୋଇଛି ।
ଚୋର ଚୋରି କରିବାକୁ ପଶିଥିବା ଫ୍ଲାଟର ଦମ୍ପତି ରାତ୍ରୀ ସମୟରେ ନିଜ କାର୍ଯ୍ୟାଳୟରେ କାମ କରି ଥାଆନ୍ତି । ଚୋରି କରୁଥିବା ଧର୍ମେନ୍ଦ୍ର ଦିଲ୍ଲୀର ବାସିନ୍ଦା ହୋଇଥିବା ବେଳେ, ଆଗରୁ ସେ ଦିଲ୍ଲୀ ଓ ଗୁଜୁରାଟରେ ଚାରି କରିବା ଅଭିଯୋଗରେ ଗିରଫ ହୋଇଛି । ଏହି ଆପାର୍ଟମେଣ୍ଟରେ ସୁରକ୍ଷା ବ୍ୟବସ୍ଥା ବେଶ୍ କଡା । ବନ୍ଧୁକଧାରୀ ସୁରକ୍ଷା କର୍ମୀ ରହିଛନ୍ତି । ୧୬ଟି ସିସି ଟିଭି କ୍ୟାମେରା ଲାଗିଛି । ଏତେ କଡା ସୁରକ୍ଷା ବ୍ୟବସ୍ଥା ମଧ୍ୟରେ ଚୋରି କିପରି ପ୍ରବେଶ କଲା ପୁଲିସ ତାହାର ତଦନ୍ତ କରୁଛି । ପଲୁସ ଚୋର ଠାରୁ ନଗଦ ଟଙ୍କା ସହ ଗହଣା ଜବତ କରିଛି ।
