ଦେଓଗାଁ: ତୁଷୁରା ଥାନା ଅନ୍ତର୍ଗତ ବିରାମୁଣ୍ଡା କଲୋନୀ ପଡାରେ ବାହାର ରାଜ୍ୟ ଲୋକେ ରହି ଗଞ୍ଜେଇ କାରବାର ଚଲାଉଥିବା ନେଇ ଅବକାରୀ ବିଭାଗ ପାଖରେ ବିଶ୍ବସ୍ତ ସୂତ୍ରରୁ ସୂଚନା ପହଞ୍ଚିଥିଲା। ସୂଚନା ପାଇବା ପରେ ଅବକାରୀ ବିଭାଗ ଅଧିକ୍ଷକଙ୍କ ନିର୍ଦେଶ କ୍ରମେ ତୁଷୁରା ଅବକାରୀ ବିଭାଗ ସହ ଜିଲା, ସଦର, ଲୋଇସିଂହା, ପାଟଣାଗଡ଼, ଖପ୍ରାଖୋଲ, ଏବଂ ମୋବାଇ ୟୁନିଟ ଆଦି ୬ ଟି ସ୍ବତନ୍ତ୍ର ଟିମ ଗଠନ ହୋଇଥିଲା। ଏହି ଟିମ ବିରମୁଣ୍ଡା କଲୋନୀ ପଡାରେ ଅଚାନକ ଚଢାଉ କରିଥିଲା।
ଅବକାରୀ ବିଭାଗ ପକ୍ଷରୁ ପ୍ରତ୍ୟକ ଘର ଯାଞ୍ଚ କରାଯାଇଥିଲା। ଯାଞ୍ଚ ସମୟରେ ଏକ ଘରେ ଓଡ଼ିଶା ବାହାର ରାଜ୍ୟର ଲୋକେ ଓ ମହିଲା ରହୁଥିବା ଦେଖିବାକୁ ପାଇଥିଲେ। ସେହି ଘରେ ଥିବା ସମସ୍ତ ସଦସ୍ୟଙ୍କୁ ପଚରାଉଚରା କରିଥିଲେ। ଏହି ଘରେ ବହୁ ପରିମାଣର ଗଞ୍ଜେଇ ଗଚ୍ଛିତ ରଖିଥିବା ନେଇ ସେମାନେ ଅବକାରୀ ବିଭାଗଙ୍କୁ କହିଥିଲେ।
ଏହାପରେ ଅବକାରୀ ବିଭାଗ ଅଧିକାରୀମାନେ ସେହି ଘରେ ଗଚ୍ଛିତ ଥିବା ୨୧ କେଜି ଗଞ୍ଜେଇକୁ ଜବତ କରିଥିଲେ। ଏନେଇ ଅବକାରୀ ବିଭାଗ ପକ୍ଷରୁ ଏକ ମାମଲା ରୁଜୁ କରାଯାଇଛି ଏବଂ ଏଥିରେ ସମ୍ପୃକ୍ତ ଥିବା ୯ ଜଣଙ୍କୁ ଗିରଫ କରିଛି ଏବଂ ଆଜି ସମସ୍ତଙ୍କୁ କୋର୍ଟ ଚାଲାଣ କରାଯାଇଛି ବୋଲି ତୁଷୁରା ଅବକାରୀ ଅଧିକାରୀ ଶ୍ରୀକାନ୍ତ ପାଣିଗ୍ରାହୀ ସୂଚନା ଦେଇଛନ୍ତି।
