ନୂଆଦିଲ୍ଲୀ : ଲୋକସଭା ବାଚସ୍ପତି ସୁମିତ୍ରା ମହାଜନ ଗୁରୁବାର ବିଶୃଙ୍ଖଳିତ ଆଚରଣ ପାଇଁ ଅଖିଳ ଭାରତୀୟ ଆନ୍ନା ଦାବ୍ରିଡ଼ ମୁନେତ୍ର କାଜଗହାମ (ଏଆଇଏଡିଏମକେ) ଓ ତେଲୁଗ ଦେଶମ ପାର୍ଟି (ଟିଡିପି)ର ୧୯ ସାଂସଦଙ୍କୁ ଗୃହରୁ ନିଲମ୍ବିତ କରିଛନ୍ତି। କାବେରୀ ପ୍ରସଙ୍ଗ ଓ ସ୍ୱତନ୍ତ୍ର ରାଜ୍ୟ ପାହ୍ୟା ଦାବି ନେଇ ଏଆଇଏଡିଏମକେ ଓ ଟିଡିପି ସାଂସଦମାନେ ଗୃହ କାର୍ଯ୍ୟ ଆରମ୍ଭରୁ ହଙ୍ଗାମା କରିଥିଲେ। ଫଳରେ ଗୃହ କାର୍ଯ୍ୟ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ମୁଲତବୀ କରାଯାଇଥିଲା। ମଧ୍ୟାହ୍ନରେ ଗୃହକାର୍ଯ୍ୟ ଆରମ୍ଭ ହେବା ମାତ୍ରେ ଏଆଇଏଡିଏମକେ ଓ ଟିଡିପି ସାଂସଦମାନେ ଗୃହର ମଧ୍ୟଭାଗକୁ ଯାଇ ସ୍ଲୋଗାନମାନ ଦେଇଥିଲେ। ବାଚସ୍ପତିଙ୍କ ବାରମ୍ବାର ତାଗିଦ୍ ପରେ ବି ସେମାନେ ନିଜ ଆସନୁ ଯାଇନଥିଲେ। ଏପରିକି ଆଇଏଡିଏମକେ ସାଂସଦମାନେ ଗୃହରେ କାଗଜଖଣ୍ଡମାନ ଫିଙ୍ଗିଥିଲେ। ଏହାପରେ ବାଚସ୍ପତି ଏଆଇଏଡିଏମକେ ସାଂସଦମାନଙ୍କ ନାମ ନେଇ କହିଥିଲେ ଯେ ଏମାନେ ଗୃହରେ ବାରମ୍ବାର ହଙ୍ଗାମା କରି ଗୃହର କାର୍ଯ୍ୟ ପରିଚାଳନାରେ ବାଧା ସୃଷ୍ଟି କରୁଛନ୍ତି। ତେଣୁ ସେମାନଙ୍କୁ ଧାରା ୩୭୪ (କ)ରେ ୪ ଦିନ ପାଇଁ ଗୃହକାର୍ଯ୍ୟରୁ ନିଲମ୍ବନ କରାଯାଉଛି। ନିଲମ୍ବିତ ଏଆଇଏଡିଏମକେ ଓ ଟିଡିପି ସାଂସଦଙ୍କ ମଧ୍ୟରେ ମାଗାନ୍ତି ମୂରଲୀ ମୋହନ, ଜୟଦେବ ଗାଲା, ଅଶୋକ ଗଜପଥୀ ରାଜୁ, ଶ୍ରୀନିବାସ ରାଓ ଏବଂ ସି ଗୋପାଳକ୍ରିଷ୍ଣନ ପ୍ରମୁଖ ଅଛନ୍ତି। ନିଲମ୍ବିତ ହେବା ପରେ ସେମାନେ ଆଉ ଲୋକସଭାର ଶୀତ କାଳୀନ ଅଧିବେଶନରେ ଯୋଗ ଦେଇପାରିବେ ନାହିଁ।
