ପଦ୍ମପୁର: ରାୟଗଡ଼ା ଜିଲ୍ଲା ଗୁଡ଼ାରୀ ଥାନା ଆମ୍ଭାବାଡ଼ି ପାହାଡ ଉପରୁ ଜଣେ ଭିନ୍ନକ୍ଷମ ଯୁବତୀ ରୀନା ଜେନାଙ୍କ ମୃତଦେହ ଉଦ୍ଧାର କରିଛି ପୁଲିସ। ଯୁବତୀଙ୍କୁ କେହି ହତ୍ୟା କରି ପାହାଡ ଉପରେ ପିଙ୍ଗି ଦେଇଥିବା ପୁଲିସ ଅନୁମାନ କରୁଛି। ପରିବାର ଲୋକେ ମଧ୍ୟ ରୀନାଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି।
ରୀନାଙ୍କ ଘର ପଦ୍ମପୁର ଥାନା ଅନ୍ତର୍ଗତ ବିରିପଦର ଗ୍ରାମରେ। ସେ ମିଶନ ଶକ୍ତିର ଏମବିକେ ପଦବୀରେ କାମ କରୁଥିଲେ। ଗତ ୨୫ ତାରିଖରେ ଏକ ମିଟିଂରେ ଯୋଗଦେବେ ବୋଲି ଘରେ କହିଥିଲେ। ସେହିଦିନ ଆଉ ସନ୍ଧ୍ୟାରେ ଆସିଲେ ନାହିଁ। ପରେ ପଦ୍ମପୁର ପୁଲିସକୁ ସୂଚନା ଦେବା ପରେ ଖୋଜାଖୋଜି କରିଥିଲେ। ୩ ଦିନ ପରେ ଆଜି ଆମ୍ଭାବାଡ଼ି ପାହାଡ ଉପରୁ ପୋଲିସ ତାଙ୍କ ମୃତଦେହ ଉଦ୍ଧାର କରିଛି। ଘଟଣା ସ୍ଥଳରେ ଗୁଣପୁର ଏସଡିପିଓ ବାବୁଲା ନାୟକ, ପଦ୍ମପୁର ଆଇଆଇସି ରଞ୍ଜନ କୁମାର ମାଝୀ, ଗୁଡ଼ାରୀ ଆଇଆଇସି ଶର୍ମପିତା ସ୍ୱାଇଁ ପହଞ୍ଚି ମୃତଦେହକୁ ଜବତ କରିଥିଲେ। ଅପରାହ୍ନରେ ସାଇଣ୍ଟିଫିକ ଟିମ୍ ପହଞ୍ଚି ଘଟଣାର ଅନୁଧ୍ୟାନ କରିଛି। ମୃତ ଯୁବତୀଙ୍କ ବାପା କହିଛନ୍ତି ଯେ, କେହି ଦୁର୍ବୃତ୍ତ ଝିଅକୁ ହତ୍ୟା କରି ପାହାଡ ଉପରେ ଫିଙ୍ଗି ଦେଇଛନ୍ତି। ମୋ ଝିଅ ଭିନ୍ନକ୍ଷମ ଏତେ ବଡ ପାହାଡ ଉପରକୁ ଯାଇପାରିବ ନାହିଁ। ମୋତେ ନ୍ୟାୟ ଦିଆଯାଉ ବୋଲି ସେ ପୁଲିସକୁ କହିଛନ୍ତି। ଗୁଡାରୀ ପୁଲିସ ଏକ ମାମଲା(୬୩/୨୦୨୪) ରୁଜୁ କରିଛି।
