ବିଜେପି ପାଇଁ ଆହ୍ୱାନ, ରାଜ୍ୟର ବହୁମୁଖୀ ବିକାଶ

ଡେସ୍କ: ସାଧାରଣ ନିର୍ବାଚନ ୨୦୨୪ ପୂର୍ବରୁ ଓ ପରେ ଏକଜିଟ ପୋଲ ନେଇ ଜାତୀୟ ସ୍ଥରରେ ବିଜେପିକୁ ଯେଉଁଭଳି ସଫଳତା ମିଳିବ ବୋଲି ଆକଳନ କରାଯାଉଥିଲା, ସେଭଳି ଯଦିଓ ହେଲାନାହିଁ କିନ୍ତୁ ଦଳ ଓଡ଼ିଶାର ରାଜନୈତିକ ଦୃଶ୍ୟପଟ୍ଟରେ ବଡ଼ ପରିବର୍ତ୍ତନର ସୂଚନା ଦେଇଛି। ଓଡ଼ିଶାର ଜନସାଧାରଣ ବିଜେପି ଠାରୁ ରାଜ୍ୟରେ ସକାରାତ୍ମକ ବିକାଶ ଆଣିବା ନିମନ୍ତେ ବହୁତ ଆକାଂକ୍ଷା ରଖିଥିବା ନିର୍ବାଚନ ଫଳାଫଳ ସୂଚାଉଛି। ୭୮ଟି ଆସନରେ ବିଜୟୀ ହେବା ପରେ ପରିବର୍ତ୍ତନ ଏବଂ ପ୍ରଗତି ପାଇଁ ଓଡ଼ିଶାବାସୀ କ୍ଷମତାର ଏକ ନିର୍ଣ୍ଣାୟକ ପରିବର୍ତ୍ତନ କରିଛନ୍ତି ବୋଲି କୁହାଯାଇପାରିବ।

ଓଡ଼ିଶାରେ ବିଜେପିର ବିଜୟ ଏକ ଐତିହାସିକ ମୁହୂର୍ତ୍ତ ଯାହା ରାଜ୍ୟରେ ପରିବର୍ତ୍ତନ ଆଣିବାର ସମ୍ଭାବନା ବହନ କରେ। ଏହି ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହାସଲ ପରେ ଅର୍ଥନୈତିକ ବିକାଶ, ଶିଳ୍ପ ଅଭିବୃଦ୍ଧି, ଭିତ୍ତିଭୂମି ବିକାଶ ଏବଂ ନୂତନ ଯୋଜନା ଗୁଡ଼ିକୁ ପ୍ରାଥମିକତା ଦେଇ ବିଜେପି ଓଡ଼ିଶାର ଲୋକଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିପାରିବ। ଏହି ପ୍ରୟାସ ଗୁଡ଼ିକୁ ପ୍ରଭାବୀ ଢଙ୍ଗରେ ଆଗେଇ ନେବାରେ ଜଣେ ଦକ୍ଷ ମୂଖ୍ୟମନ୍ତ୍ରୀଙ୍କ ଚୟନ ଗୁରୁତ୍ୱପୂର୍ଣ୍ଣ ହେବ। ସଠିକ ନେତୃତ୍ୱ ଏବଂ ରଣନୈତିକ ପଦକ୍ଷେପ ଦ୍ୱାରା ବିଜେପିର ଶାସନ ଓଡ଼ିଶା ପାଇଁ ଏକ ଉଜ୍ଜ୍ୱଳ ଏବଂ ସମୃଦ୍ଧ ଭବିଷ୍ୟତ ପାଇଁ ପଥ ନିର୍ମାଣ କରିପାରିବ।

ଉତ୍କଳ ବିଶ୍ୱବିଦ୍ୟାଳୟର ସାମ୍ବାଦିକତା ଏବଂ ଗଣ ଯୋଗାଯୋଗ ବିଭାଗର ଗବେଷିକା ଶ୍ରୀୟଙ୍କା ସାହୁ କହିଛନ୍ତି, ବିଜେପି ଏହି ଗୁରୁତ୍ୱପୂର୍ଣ୍ଣ ଭୂମିକାରେ ପାଦ ଦେଉଥିବାରୁ ଏହା ଦୀର୍ଘସ୍ଥାୟୀ ସମସ୍ୟାର ସମାଧାନ ତଥା ଓଡିଶାର ବ୍ୟାପକ ସମ୍ଭାବନାକୁ ଉପଯୋଗ କରିବାର ଅପାର ଦାୟିତ୍ୱର ସମ୍ମୁଖୀନ ହୋଇଛି। ବିଜେପିର ବିଜୟ କେବଳ ବିକାଶ ପାଇଁ ଏକ ଆକାଂକ୍ଷା ପ୍ରତିଫଳିତ କରେ ନାହିଁ ବରଂ ଉନ୍ନତ ଶାସନ ଏବଂ ଉତ୍ତରଦାୟିତ୍ୱ ପାଇଁ ଏକ ଚାହିଦା ମଧ୍ୟ ପ୍ରତିଫଳିତ କରେ। ଏହି ଗତିକୁ ବଜାୟ ରଖିବା ପାଇଁ, ବିଜେପିର ପ୍ରାଥମିକ ଧ୍ୟାନ ବ୍ୟାପକ ଅର୍ଥନୈତିକ ବିକାଶ ଉପରେ ରହିବା ଉଚିତ ବୋଲି ସେ କହିଛନ୍ତି। କେବଳ ଯେ ଗୋଟିଏ କ୍ଷେତ୍ର ତାହା ନୁହେଁ, ବରଂ ସମସ୍ତ କ୍ଷେତ୍ରରେ ଭିତ୍ତିଭୂମିର ଆଧୁନିକୀକରଣ ଦଳ ପାଇଁ ଆହ୍ୱାନ ହେବ। ସଡ଼କ ସଂଯୋଗ ହେଉ କି ବିଦ୍ୟୁତ୍ ଯୋଗାଣ କିମ୍ବା ଶିକ୍ଷା ଓ ସ୍ୱାସ୍ଥ୍ୟସେବା ହେଉ, ତୃଣମୂଳ ସ୍ଥରରେ ଭିତ୍ତିଭୂମି ସୁଦୃଢ଼ୀକରଣ ଆଗାମୀ ଦିନର ଏଜେଣ୍ଡା, ଏଥିରେ ସନ୍ଦେହ ନାହିଁ।

ଘରୋଇ ଓ ବିଦେଶୀ ପୁଞ୍ଜି ବିନିଯୋଗକୁ ଆକର୍ଷିତ କରିବା, ବେରୋଜଗାରୀ ସମସ୍ୟା, ମହିଳାଙ୍କ ସ୍ୱାସ୍ଥ୍ୟ, ଶିକ୍ଷା, ବ୍ୟବସାୟ ଅନୁକୁଳ ପରିବେଶ ସୃଷ୍ଟି, ଅଧିକ ଆର୍ଥିକ ଆବଣ୍ଟନ ଓ ମୁଣ୍ଡପିଛା ଆୟ ବୃଦ୍ଧି ନୂଆ ସରକାରଙ୍କ ପାଇଁ ନିଶ୍ଚିତ ଭାବେ ଆହ୍ୱାନମୂଳକ ପରିସ୍ଥିତି ସୃଷ୍ଟି କରିବ। ଅନ୍ୟ ପକ୍ଷରେ ରାଜ୍ୟରେ ଅନେକ ହେଭି ୱେଟ ନେତା ଥିବା ବେଳେ ମୁଖ୍ୟମନ୍ତ୍ରୀ ପଦ ପାଇଁ ଦଳ କାହାକୁ ଚୟନ କରୁଛି, ତାହା ଉପରେ ଦଳ ଓ ରାଜ୍ୟ ରାଜନୀତିର ଭବିଷ୍ୟତ ନିର୍ଭର କରୁଛି।

ସଠିକ ନେତୃତ୍ୱ ଏବଂ ରଣନୈତିକ ପଦକ୍ଷେପ ଦ୍ୱାରା ବିଜେପିର ଶାସନ ଓଡ଼ିଶା ପାଇଁ ଏକ ଉଜ୍ଜ୍ୱଳ ଏବଂ ସମୃଦ୍ଧ ଭବିଷ୍ୟତ ପାଇଁ ପଥ ନିର୍ମାଣ କରିପାରିବ ବୋଲି ଗବେଷିକା ଶ୍ରୀୟଙ୍କା ସାହୁ କହିଛନ୍ତି।

ଶ୍ରୀୟଙ୍କା ସାହୁ, ଗବେଷିକା
ସାମ୍ବାଦିକତା ଏବଂ ଗଣ ଯୋଗାଯୋଗ ବିଭାଗ
ଉତ୍କଳ ବିଶ୍ୱବିଦ୍ୟାଳୟ