ଆଠଗଡ଼: ଆଠଗଡ଼ ବ୍ଲକର ମେଘା ପଞ୍ଚାୟତ ଅନ୍ତର୍ଗତ ଦାଶପୁର ଗ୍ରାମର ୯ନଂ ୱାର୍ଡରେ ରାସନ ସାମଗ୍ରୀ ବଣ୍ଟନରେ ବ୍ୟାପକ ଅନିୟମିତତା ହୋଇଥିବା ଏବଂ ହିତାଧିକାରୀ ୪ମାସର ଚାଉଳ ପାଇନଥିବା ନେଇ ଅଭିଯୋଗ କରିଛନ୍ତି। ଉକ୍ତ ଅଞ୍ଚଳର ଡିଲର ୯ନଂ ୱାର୍ଡର ୬୨ଜଣ ରାସନ କାର୍ଡଧାରୀଙ୍କର ଜାନୁଆରୀ ମାସରୁ ଏପ୍ରିଲ ମାସ ପର୍ଯ୍ୟନ୍ତ ଚାଉଳ ଦେଇନଥିବା ସଂପୃକ୍ତ ଗ୍ରାମବାସୀ ସୋମବାର ଆଠଗଡ଼ ଉପଜିଲ୍ଲାପାଳଙ୍କ କାର୍ଯ୍ୟକୁ ଆସି ସହକାରୀ ଯୋଗାଣ ଅଧିକାରୀଙ୍କୁ ଅଭିଯୋଗ କରିଥିଲେ। କେବଳ ୯ନଂ ୱାର୍ଡ ନୁହେଁ ବରଂ ଦାଶପୁର ଗ୍ରାମର ଶତାଧିକ ଲୋକ ୪ମାସର ପଡ଼ି ଚାଉଳ ପାଇବାରୁ ବଞ୍ଚିତ ହୋଇଛନ୍ତି ବୋଲି ସେମାନେ ଅଭିଯୋଗ କରିଥିଲେ। ପିଓଏସ୍ ମେସିନରେ ହିତାଧିକାରୀଙ୍କର ଆଙ୍ଗୁଠି ଛାପ ନେଇ ସଂପୃକ୍ତ ଡିଲର ଚାଉଳ ଦେଇନଥିବା ଗୁରୁତର ଅଭିଯୋଗ ହୋଇଛି। ପୂର୍ବରୁ ଗତ ଫେବୃଆରୀ ଓ ମାର୍ଚ୍ଚମାସରେ ଏ ସଂପର୍କରେ ମେଘା ସରପଞ୍ଚ ଓ ଯୋଗାଣ ନିରୀକ୍ଷକଙ୍କ ଦୃଷ୍ଟି ଆକର୍ଷଣ କରିଥିଲେ। ପଞ୍ଚାୟତସ୍ତରରେ ଏହାର ସମାଧାନ କରାଯିବ ଏବଂ ହିତାଧିକାରୀଙ୍କୁ ତାଙ୍କ ପ୍ରାପ୍ୟ ଚାଉଳ ସଂପୃକ୍ତ ଡିଲର ପ୍ରଦାନ କରିବେ ବୋଲି ସରପଞ୍ଚ କହିଥିବା ଗ୍ରାମବାସୀ ସୂଚନା ଦେଇଥିଲେ। ତେବେ ଇତି ମଧ୍ୟରେ ଆଉ ଦୁଇମାସ ବିତି ଯାଇଥିଲେ ମଧ୍ୟ ହିତାଧିକାରୀ ଚାଉଳ ନପାଇବାରୁ ଆଜି ଆଠଗଡ଼ ସହକାରୀ ଯୋଗାଣ ଅଧିକାରୀ ଜଗମୋହନ ଦାସଙ୍କୁ ଭେଟି ଅଭିଯୋଗ କରିଥିଲେ। ଶ୍ରୀ ଦାସ ଆଠଗଡ଼ ବ୍ଲକର ଯୋଗାଣ ନିରୀକ୍ଷକ ମିଥୁନ ବେହେରାଙ୍କ ସହ ଆଲୋଚନା କରି ୨-୪ଦିନ ମଧ୍ୟରେ ସମସ୍ୟାର ସମାଧାନ କରାଯିବ ବୋଲି ପ୍ରତିଶୃତି ଦେବା ପରେ ଦାଶପୁର ଗ୍ରାମବାସୀ ଫେରିଯାଇଥିଲେ।
Comments are closed.