ପାତ୍ରପୁର : ପାତ୍ରପୁର ଗ୍ରାମରେ ଆଜି ଅପରାହ୍ନରେ ବଜ୍ରପାତ ଘଟି ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବାବେଳେ ତାଙ୍କ ପୁଅ, ୨ଜଣ ମହିଳାଙ୍କ ସମେତ ତିନି ଜଣ ଆହତ ହୋଇଛନ୍ତି । ମୃତ ବ୍ୟକ୍ତି ଜଣକ ପାତ୍ରପୁର ଗ୍ରାମର ସୀମାଞ୍ଚଳ ସାହୁ ବୋଲି ଜଣାପଡିଛି। ଆଜି ଅପରାହ୍ନରେ ପାତ୍ରପୁର ଗୌଡ଼ସାହିର ସୀମାଞ୍ଚଳ ଏବଂ ତାଙ୍କ ପୁଅ ସହିତ ଅନ୍ୟ କିଛି ବ୍ୟକ୍ତି ରାଶି ଅମଳ ପାଇଁ ଗ୍ରାମ ନିକଟ ଜମିକୁ ଯାଇ ଅମଳ କରୁଥିଲେ। ଏହି ସମୟରେ କାଳବୈଶାଖୀ ବର୍ଷା ହେବା ସହିତ ବଜ୍ରପାତ ଘଟି ସୀମାଞ୍ଚଳଙ୍କ ସହିତ ତାଙ୍କ ପୁଅ ଶିବଶଙ୍କର ସାହୁ, ପଦ୍ମା ଗୌଡ଼ ଏବଂ ବୈଜୟନ୍ତୀ ବେହେରା ଆହତ ହୋଇଥିଲେ। ଏହା ଜାଣିବା ପରେ ନିକଟରେ ରାଶି ଅମଳ କରୁଥିବା ଅନ୍ୟ ବ୍ୟକ୍ତିମାନେ ସମସ୍ତ ଆହତଙ୍କୁ ପାତ୍ରପୁର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ଆଣିଥିଲେ। ତେବେ ଡାକ୍ତର ସୀମାଞ୍ଚଳଙ୍କୁ ମୃତ ଘୋଷଣା କରିଥିଲେ। ଅନ୍ୟ ଆହତମାନେ ପାତ୍ରପୁର ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡିଛି। ପୁଲିସ ଖବର ପାଇ ଡାକ୍ତରଖାନାରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ପଠାଇଛି।
Popular Categories
Previous article
Next article