ଫୁଲବାଣୀ : କନ୍ଧମାଳ ଜିଲ୍ଲା ଫୁଲବାଣୀ ବନଖଣ୍ଡ ଅନ୍ତର୍ଗତ ସୁଡ୍ରୁକୁମ୍ପା ରେଞ୍ଜର ଡଙ୍ଗା ଅଞ୍ଚଳରୁ ଜଙ୍ଗଲୀ କୁଟୁରା ମୁଣ୍ଡ ଓ ହନୁ ମାଙ୍କଡ଼ର ଶୁଖିଲା ମାଂସ ଜବତ କରାଯାଇଛି। ଏହା ସହିତ ଜଙ୍ଗଲୀ ଜନ୍ତୁଙ୍କ ଶିକାର କରୁଥିବା ଏକ ୯ ଜଣିଆ ଦଳକୁ ଚିହ୍ନଟ କରାଯାଇଛି। ସେମାନଙ୍କ ମଧ୍ୟରୁ ଜଣକୁ ଗିରଫ କରିଛି ବନବିଭାଗ । ଗିରଫ ଅଭିଯୁକ୍ତ ଜଣକ ସମ୍ବଲପୁର ଜିଲ୍ଲା ଜମନକିରା ଥାନା ଅନ୍ତର୍ଗତ ଛିନିମାହୁଲ ଗାଁର ରମେଶ ଭେଙ୍ଗରା ବୋଲି ଜଣାପଡିଛି। ତାଠାରୁ ସଦ୍ୟ ୪ କିଲୋ କୁଟୁରା ମାଂସ ଓ ମୁଣ୍ଡ ସମେତ ହନୁ ମାଙ୍କଡ଼ର ୧ କିଲୋ ଶୁଖିଲା ମାଂସ ସମେତ ଶିକାର କାର୍ଯ୍ୟରେ ବ୍ୟବହାର ହେଉଥିବା ଟାଙ୍ଗିଆ, ଛୁରି, ଦଉଡି, ଜାଲ ଏବଂ ଗୁଲେଟ୍ ଆଦି ଜବତ କରାଯାଇଛି। ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ସୂଚନା ଦେଇଛନ୍ତି ଫୁଲବାଣୀ ଡିଏଫଓ ପ୍ରଶାନ୍ତ କୁମାର ପଟେଲ ।
