ସମ୍ବଲପୁର : ସମ୍ବଲପୁର ଦେଇ ଦେଶକୁ ଯାଇଥିବା ସଡକ ଓ ରେଳ ପଥ ଜରିଆରେ ନିୟମିତ ଅବୈଧ୍ୟ ରୂପେ ଗଞ୍ଜେଇ ଚାଲାଣ ହେଉଥିବାର ଦେଖାଯାଉଥିବା ବେଳେ ଅନେକ ସମୟରେ ଚାଲାଣକାରୀ ମାନେ ଧରାପଡିବା ସହିତ ଗଞ୍ଜେଇ ଗୁଡିକ ମଧ୍ୟ ଜବତ ହେଉଛି।
ଏଭଳି ଏକ ଘଟଣାରେ ସମ୍ବଲପୁରରୁ ରେଳପଥ ଜରିଆରେ ରାଜ୍ୟ ବାହାରକୁ ଅବୈଧ୍ୟ ରୂପେ ଗଞ୍ଜେଇ ଚାଲାଣ କରୁଥିବା ସମୟରେ ଜିଆରପି ଜଣେ ମହିଳାଙ୍କ ସମେତ ୨ ଜଣଙ୍କୁ ଗିରଫ କରିଛି। ଜିଆରପିର ସୂଚନାନୁଯାୟୀ, ସମ୍ବଲପୁର ରେଳ ଷ୍ଟେସନରେ ସୋମବାର ରାତ୍ରିରେ ପେଟ୍ରୋଲିଂ ସମୟରେ ପ୍ଲାଟଫର୍ମ ସଂଖ୍ୟା ୨ ଓ ୩ ର ଶେଷ ଭାଗରେ ବିହାର ରାଜ୍ୟର ନିବାସୀ ଜଣେ ମହିଳା ମନସା ଦେବୀ (୩୫) ଓ ଯୁବକ ଗୁଲାମ ଜିଲାନି (୧୯) ନାମକ ଯୁବକ ସନ୍ଦିଗ୍ଧ ଭାବରେ ୩ଟି ଜରିବସ୍ତା ବ୍ୟାଗ ସହିତ ଛିଡା ହୋଇଥିବାର ଦେଖିଥିଲା।
ଏଣୁ ସନ୍ଦେହରେ ସେମାନଙ୍କୁ ଯାଞ୍ଚ କରାଯିବାରୁ ଜରି ବସ୍ତା ବ୍ୟାଗ ଗୁଡିକ ମଧ୍ୟରୁ ସମୁଦାୟ ୪୫ କିଗ୍ରା ଗଞ୍ଜେଇ ମିଳିଥିଲା। ପୁଲିସର ଜେରା ସମୟରେ ଉକ୍ତ ଗଞ୍ଜେଇ ଗୁଡିକୁ ବିହାର ରାଜ୍ୟକୁ ଚାଲାଣ କରୁଥିବାର କହିଛନ୍ତି। ଏଣୁ ଜିଆରପି ପକ୍ଷରୁ ଏକ ମାମଲା ରୁଜୁ କରାଯାଇ ଅଭିଯୁକ୍ତ ମାନଙ୍କୁ ଗିରଫ କରି ମଙ୍ଗଳବାର ଅଦାଲତକୁ ଚାଲାଣ କରାଯାଇଛି ବୋଲି ସୂଚନା ଦିଆଯାଇଛି। ପାଟ୍ରୋଲିଂ ଦଳରେ ଜିଆରପି ଏସଆଇ ଚାରୋ ତିର୍କୀ, ଏଏସଆଇ ଜ୍ୟେତ୍ସ୍ନା ପ୍ରଧାନ ଓ ଅନ୍ୟ କର୍ମଚାରୀ ମାନେ ସାମିଲ ରହିଥିଲେ।
