ନୂଆଦିଲ୍ଲୀ: ଏପ୍ରିଲ ପହିଲାରୁ ଆର୍ଥିକ ବର୍ଷ ଆରମ୍ଭ ହେବାକୁ ଯାଉଥିବା ବେଳେ ଏହି ମାସରେ ବିଭିନ୍ନ ରାଜ୍ୟରେ ୧୨ ଦିନ ବ୍ୟାଙ୍କ ବନ୍ଦ ରହିବ। ତେବେ ରାଜ୍ୟ ଅନୁସାରେ ବ୍ୟାଙ୍କ ଛୁଟି ସଂଖ୍ୟା ଭିନ୍ନ ଭିନ୍ନ। ଭାରତୀୟ ରିଜର୍ଭ ବ୍ୟାଙ୍କ ୱେବସାଇଟରେ ଦିଆଯାଇଥିବା ସୂଚନାରୁ ଏହା ସ୍ପଷ୍ଟ ହୋଇଛି। ଏଥିରେ ବିଭିନ୍ନ ରାଜ୍ୟରେ ଅନେକ ପର୍ବ ପାଇଁ ଛୁଟି ସହିତ ଦ୍ବିତୀୟ ଓ ଚତୁର୍ଥ ଶନିବାର ଏବଂ ରବିବାର ଛୁଟି ଅନ୍ତର୍ଭୁକ୍ତ। ଏପ୍ରିଲରେ ରବିବାର ଏବଂ ଦ୍ବିତୀୟ ଓ ଚତୁର୍ଥ ଶନିବାରକୁ ମିଶାଇ ମୋଟ ୬ଟି ଛୁଟି ରହିଛି। ସେହିପରି ଏପ୍ରିଲ ୧ରେ ବ୍ୟାଙ୍କର ବାର୍ଷିକ କ୍ଲୋଜିଙ୍ଗ ପାଇଁ ସାଧାରଣ ଲୋକଙ୍କ ନିମନ୍ତେ ବ୍ୟାଙ୍କ ବନ୍ଦ ରହିବ। ସେହିପରି ୫ ଏପ୍ରିଲରେ ବାବୁ ଜଗଜ୍ଜୀବନ ରାମଙ୍କ ଜୟନ୍ତୀ ପାଇଁ କେତେକ ରାଜ୍ୟରେ ବ୍ୟାଙ୍କ ବନ୍ଦ ରହିବ। ଏପ୍ରିଲ ୯ ତେଲୁଗୁ ନୂତନ ବର୍ଷ ପାଇଁ ତେଲେଙ୍ଗାନା, ଆନ୍ଧ୍ରପ୍ରଦେଶରେ ବ୍ୟାଙ୍କ ବନ୍ଦ ରହିବ। ସେହିପରି ଏପ୍ରିଲ ୧୦ କିମ୍ବା ୧୧ରେ ଇଦ୍ ପାଇଁ ବ୍ୟାଙ୍କ ବନ୍ଦ ରହିବ। ତେବେ ଏପ୍ରିଲ ୧୩ ଓ ୧୪ ବୈଶାଖୀ ଓ ଆମ୍ବେଦକର ଜୟନ୍ତୀ ପାଇଁ ଛୁଟି ହୋଇଥିଲେ ବି ତାହା ଦ୍ବିତୀୟ ଶନିବାର ଓ ରବିବାର ପଡ଼ୁଛି। ୧୭ ଏପ୍ରିଲ ରାମନବମୀ ପାଇଁ ବ୍ୟାଙ୍କ ବନ୍ଦ ରହିବ। ଗରିଆ ପୂଜା ପାଇଁ ୨୦ ତାରିଖରେ ମଣିପୁରରେ ବ୍ୟାଙ୍କ ବନ୍ଦ ରହିବ। ଓଡ଼ିଶାରେ ଏହି ଛୁଟି ସଂଖ୍ୟା ୯ ରହିଛି। ଓଡ଼ିଶାରେ ରବିବାର ଏବଂ ଦ୍ବିତୀୟ ଓ ଚତୁର୍ଥ ଶନିବାର ୬ଦିନ ଛୁଟି ସହ ୧, ୧୧ ଓ ୧୭ତାରିଖରେ ବ୍ୟାଙ୍କ ବନ୍ଦ ରହିବ।
Comments are closed.