ବାଲିଆପାଳ: ବାଲିଆପାଳ ତହସିଲ ଅଧିନରେ ଥିବା ସୁବର୍ଣ୍ଣରେଖା ନଦୀ ଅବବାହିକା ବାଲି ମାଫିଆଙ୍କ ଭୂସ୍ୱର୍ଗ ପାଲଟିଛି । ଏହି ତହସିଲ ଅନ୍ତର୍ଗତ ଅସ୍ତି, ନିଖିରା, ବିଷ୍ଣୁପୁର, ଜାମକୁଣ୍ଡା, ବାଲିଆପାଳ ଆଦି ପଞ୍ଚାୟତର ୪୦ରୁ ଊର୍ଦ୍ଧ୍ୱ ସ୍ଥାନରେ ଦିନ ରାତି ବେଧଡକ ବାଲି ଚୋରା ଚାଲାଣ ହେଉଥିଲେ ମଧ୍ୟ ପ୍ରଶାସନର ନିଷ୍କ୍ରିୟତା ବାଲି ମାଫିଆଙ୍କୁ ଉତ୍ସାହିତ କରୁଛି । ପ୍ରଶାସନର ନିରବତା ବିରୋଧରେ ଗୁରୁବାର ବାଲିଆପାଳ କର୍ମଦ୍ଦା ମୁଖ୍ୟରାସ୍ତାର ଛୋଟଖାନପୁର ନିକଟରେ ଶତାଧିକ ମହିଳା ଟାୟାର ଜାଳି ରାସ୍ତା ରୋକ କରିଥିଲେ । ଏଠାରେ ସୂଚନା ଥାଉକି, ଅସ୍ତି ଗ୍ରାମପଞ୍ଚାୟତ ଅନ୍ତର୍ଗତ ଛୋଟଖାନପୁର ଗ୍ରାମରେ ବାଲି ମାଫିଆମାନେ ଦିନ ରାତି ଜେସିବି ମେସିନ ସାହାଯ୍ୟରେ ବାଲି ଉଠାଇ ପଶ୍ଚିମବଙ୍ଗକୁ ରପ୍ତାନୀ କରୁଥିଲେ ମଧ୍ୟ ପ୍ରଶାସନ ନିଦାବିଷ୍ଣୁ ସାଜିଛି । ବାଲି ଚୋରି ରୋକିବା ପାଇଁ ଗ୍ରାମବାସୀ ବିଭିନ୍ନ ସମୟରେ ସ୍ଥାନୀୟ ପ୍ରଶାସନଠାରୁ ଆରମ୍ଭ କରି ଜିଲାପାଳଙ୍କ ପର୍ଯ୍ୟନ୍ତ ଲିଖିତ ଅଭିଯୋଗ କରିଆସୁଥିଲେ ମଧ୍ୟ ବାଲି ମାଫିଆମାନେ କାହାକୁ ଭୃକ୍ଷେପ କରୁନାହାନ୍ତି ।
ଅପରପକ୍ଷେରେ ଅଭିଯୋଗ କରୁଥିବା ଗ୍ରାମବାସୀଙ୍କୁ ବାଲି ମାଫିଆମାନେ ଜୀବନରୁ ମାରିଦେବାକୁ ଧମକ ଦେଉଛନ୍ତି । ବାରମ୍ବାର ପ୍ରଶାସନକୁ ଗୁହାରୀ କରିବା ପରେ ମଧ୍ୟ ବାଲି ଚୋରିରେ ରୋକ ଲାଗି ପାରୁନାହିଁ । ଛୋଟଖାନପୁର ଗ୍ରାମର ସୁବର୍ଣ୍ଣରେଖା ନଦୀ ସଂଲଗ୍ନ ୫ ହେକ୍ଟରରୁ ଊର୍ଦ୍ଧ୍ବ ସରକାରୀ ଜାଗାରୁ ବେଧଡକ ବାଲି ଉତ୍ତୋଳନ ଯୋଗୁଁ ଗ୍ରାମ ପ୍ରତି ବିପଦ ସୃଷ୍ଟି ହେଲାଣି । ଯେଉଁଥିପାଇଁ ଗ୍ରାମର ଶତାଧିକ ମହିଳା ବାଲିଆପାଳ-କର୍ମଦ୍ଦା ମୁଖ୍ୟରାସ୍ତାରେ ଟାୟାର ଜାଳି ପ୍ରତିବାଦ କରିଥିଲେ । ଘଟଣା ସଂପର୍କରେ ଖବର ପାଇ ବାଲିଆପାଳ ଅତରିକ୍ତ ତହସିଲଦାର ସୁବ୍ରତ କୁମାର ପାତ୍ର, ବସ୍ତା ଏସଡିପିଓ ଅରୁଣ କୁମାର ସାହୁ, ବାଲିଆପାଳ ଥାନା ଅଧିକାରୀ ସଦାନନ୍ଦ ନାୟକ ପ୍ରମୁଖ ପହଞ୍ଚି ବାଲି ଚୋରି ରୋକିବାର ପ୍ରତିଶୃତି ଦେବା ପରେ ରାସ୍ତାରୋକ ହଟିଥିଲା ।
Comments are closed.