ମୁମ୍ବଇ : ବୁଧବାର ବିବାହ ବନ୍ଧନରେ ଆବଦ୍ଧ ହେଉଛନ୍ତି ଦେଶର ସବୁଠାରୁ ଧନୀ ବ୍ୟବସାୟୀ ମୁକେଶ ଅମ୍ବାନୀଙ୍କ ଝିଅ ଈଶା ଅମ୍ବାନୀ। ଏଥିପାଇଁ ଆଲୋକମାଳା ଓ ରଙ୍ଗୀନ ଫୁଲରେ ଝଲସୁଛି ତାଙ୍କ ମୁମ୍ବଇ ସ୍ଥିତ ବାସଭବନ ଏଣ୍ଟିଲିୟା। ଇଶାଙ୍କ ବିବାହ ବିଶିଷ୍ଟ ବ୍ୟବସାୟୀ ପୀରାମଲ ପରିବାରର ପୁଅ ଆନନ୍ଦ ପୀରାମଲଙ୍କ ସହ ଅନୁଷ୍ଠିତ ହେଉଛି। ଅମ୍ବାନୀଘରର ଏହି ବାହାଘର ଉପରେ ସମସ୍ତଙ୍କ ଦୃଷ୍ଟି ରହିଛି । ଏହାକୁ ବି ଚଳିତ ବର୍ଷର ସବୁଠୁ ବଡ଼ ବାହାଘର ବୋଲି କୁହାଯାଉଛି । ବାହାଘରର ଆୟୋଜନସ୍ଥଳ ଏଣ୍ଟିଲିୟା ହେଉଛି ଦେଶର ସବୁଠୁ ବ୍ୟୟବହୁଳ ଘର। ୨୭ ମହଲା ବିଶିଷ୍ଟ ଏଣ୍ଟିଲିୟାକୁ ତିଆରି କରିବା ପାଇଁ ୧୦ହଜାର ୫ଶହ କୋଟି ଟଙ୍କା ଖର୍ଚ୍ଚ ହୋଇଛି। ଫୋର୍ବସ ମ୍ୟାଗାଜିନ୍ ଦ୍ୱାରା ପ୍ରକାଶିତ ୨୦ଜଣ ସବୁଠାରୁ ଧନୀ ବ୍ୟକ୍ତିଙ୍କ ଘରର ତାଲିକାରେ ଏଣ୍ଟିଲିୟା ପ୍ରଥମ ସ୍ଥାନରେ ରହିଛି ।
ଅମ୍ବାନୀ ପରିବାରର ଏହି ମହାବିବାହରେ ଅନେକ ଲୋକପ୍ରିୟ ସିନେ-ତାରକାଙ୍କ ସମେତ ରାଜନୀତି ଜଗତର ବହୁ ପ୍ରସିଦ୍ଧ ବ୍ୟକ୍ତିତ୍ୱ ଯୋଗ ଦେଉଛନ୍ତି । ସୂଚନା ଅନୁସାରେ ପ୍ରାୟ ୬୦୦ ଅତିଥି ଏହି ବିବାହ ଉତ୍ସବରେ ଯୋଗ ଦେଉଛନ୍ତି । ଏଥିପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି।
ବିବାହ ପରେ ଗୁରୁବାର ପୀରାମଲ ପରିବାର ଓ ଶୁକ୍ରବାର ଅମ୍ବାନୀ ପରିବାର ପକ୍ଷରୁ ପୃଥକ ପୃଥକ ରିସେପସନ୍ ପାର୍ଟିର ଆୟୋଜନ କରାଯିବ ବୋଲି ସୂଚନା ମିଳିଛି।
