ମୁମ୍ବଇ: ମୁମ୍ବଇରେ ଗୁରୁବାର ଶିବସେନା(ଉଦ୍ଧବ ବାଲାସାହେବ ଠାକରେ) ନେତା ଅଭିଷେକ ଘୋସାଲକରଙ୍କୁ ଗୁଳି କରି ହତ୍ୟା କରାଯାଇଛି। ଆଶ୍ଚର୍ଯ୍ୟକର କଥା ହେଉଛି, ସ୍ଥାନୀୟ ସାମାଜିକ କାର୍ଯ୍ୟକର୍ତ୍ତା ମୋରିସ୍ ନୋରୋହ୍ନା ଫେସବୁକ୍ ଲାଇଭ୍ ସମୟରେ ଏଭଳି ଭୟଙ୍କର ପଦକ୍ଷେପ ନେଇଛନ୍ତି। ଏହାପରେ ନୋରୋହ୍ନା ନିଜକୁ ମଧ୍ୟ ଗୁଳି କରି ଆତ୍ମହତ୍ୟା କରିଛନ୍ତି। ଏହି ମାମଲାରେ ରାଜ୍ୟ ସରକାରଙ୍କ ବିରୋଧରେ ଗୁରୁତର ଅଭିଯୋଗ କରାଯାଉଛି। ଏସବୁ ମଧ୍ୟରେ ମାମଲାର ତଦନ୍ତ ଦାୟିତ୍ବ ମୁମ୍ବଇ କ୍ରାଇମ ବ୍ରାଞ୍ଚକୁ ହସ୍ତାନ୍ତର କରାଯାଇଛି।
ପୁଲିସ ସୂଚନା ମୁତାବକ, ଘୋସାଲକରଙ୍କୁ ଗୁଳି ବାଜିବା ପରେ ଉତ୍ତର ମୁମ୍ବଇର ଏକ ହସ୍ପିଟାଲରେ ତାଙ୍କର ମୃତ୍ୟୁ ଘଟିଛି। ଘଟଣାର ଫେସ୍ବୁକ୍ ଲାଇଭ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି। ତେବେ ଘୋସାଲକର ଓ ନୋରୋହ୍ନାଙ୍କ ମଧ୍ୟରେ ପାରସ୍ପରିକ ଶତ୍ରୁତା ଥିବା କୁହାଯାଉଛି।
ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି ଯେ, ଅଭିଷେକ ଘୋସାଲକରଙ୍କୁ ଚାରିଥର ଗୁଳି କରାଯାଇଥିଲା। ଅଭିଷେକଙ୍କ ପେଟ ଓ କାନ୍ଧରେ ଗୁଳି ବାଜିଥିଲା। ଆକ୍ରମଣକାରୀ ନୋରୋହ୍ନା ଏକ ବେଆଇନ ବନ୍ଧୁକ ବ୍ୟବହାର କରିଥିଲେ ଏବଂ ଘଟଣା ଘଟାଇବା ପରେ ସେ ନିଜକୁ ମଧ୍ୟ ଗୁଳି କରି ଦେଇଥିଲେ।
