ରାଜସ୍ଥାନ: ୧୯ବର୍ଷରୁ କମ୍ ବିଶ୍ୱକପରେ ଭାରତର ଅଧିନାୟକ ଦାୟିତ୍ୱ ତୁଲାଉଥିବା ଯୁବ ଖେଳାଳୀ ଉଦୟ ସହରନଙ୍କୁ ନେଇ ଏବେ ସବୁଠି ଚର୍ଚ୍ଚା । ଉଦୟ ସହରନ ରାଜସ୍ଥାନର ଶ୍ରୀଗଙ୍ଗନଗର ସହରର ମଦେରା ଗ୍ରାମରେ ୨୦୦୪ ସେପ୍ଟେମ୍ବର ୮ରେ ଜନ୍ମଗ୍ରହଣ କରିଥିଲେ । ଉଦୟ ପ୍ରାରମ୍ଭିକ ଶିକ୍ଷା ଶ୍ରୀଗଙ୍ଗନଗରରେ ଆରମ୍ଭ କରିଥିବା ବେଳେ ଫାଜିଲ୍କାରେ ଥିବା ଆତ୍ମ ବଲ୍ଲଭ ପବ୍ଲିକ ସ୍କୁଲରେ ଅଷ୍ଟମ ଓ ନବମ ଶ୍ରେଣୀ ଯାଏ ପାଠ ପଢିଥିଲେ । ପାଠ ପଢିବା ସହିତ ୧୧ବର୍ଷରୁ ଉଦୟ କ୍ରିକେଟ ଖେଳିବା ଆରମ୍ଭ କରିଥିଲେ । ପରେ ଉଦୟ ବଠିଣ୍ଡା ଯାଇ ସେଠାରୁ ଅଧିକ ଶିକ୍ଷା ଗ୍ରହଣ କରିଥିଲେ । ବର୍ତ୍ତମାନ ଉଦୟ ବଠିଣ୍ଡାର ଏସଏସଡି କଲେଜ ଅଫ୍ ପ୍ରଫେସନାଲ ଷ୍ଟଡିଜ୍ ମହାବିଦ୍ୟାଳୟରେ ଯୁକ୍ତ ୩ ଦ୍ୱିତୀୟ ବର୍ଷରେ ପାଠ ପଢୁଛନ୍ତି । ମଙ୍ଗଳବାର ୧୯ବର୍ଷରୁ କମ ବିଶ୍ୱକପରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ୮୧ରନର ଚମତ୍କାର ଇନିଂସ ଖେଳିଥିଲେ ଉଦୟ । ଚାପରେ ଥାଇ ମଧ୍ୟ ସେ ଭଲ ପ୍ରବର୍ଶନ କରିପାରିବେ ବୋଲି ପ୍ରମାଣ କରିଛନ୍ତି ।
ଏହି ଯୁବ ଖେଳାଳୀଙ୍କୁ କ୍ରୀଡା ପ୍ରେମୀ ଖୁବ ପ୍ରଶଂସା କରୁଛନ୍ତି । ୧୧ ବର୍ଷ ବୟସରେ ପ୍ରଥମ ଥର ପାଇଁ ଜିଲା କ୍ରିକେଟ ଆସୋସିଏସନ ଫାଜିଲ୍କା ପାଇଁ ଖେଳିଥିଲେ ଉଦୟ । ପ୍ରଥମେ ୧୬ବର୍ଷରୁ କମ କ୍ରିକେଟ ମ୍ୟାଚରେ ମନୋନୀତ ହୋଇଥିଲେ । ପଞ୍ଜାବରେ ୧୪ବର୍ଷର କମ କ୍ରିକେଟ ଖେଳିବା ପାଇଁ ପରୀକ୍ଷା ଦେଇଥିଲେ ଉଦୟ । ପଞ୍ଜାବ କ୍ରିକେଟ ଆସୋସିଏସନର ଚୟନ କମିଟିର ସଭାପତି ବଲଭୀର ସିଂ ଏହି ପରୀକ୍ଷା ନେଇ ଉଦୟଙ୍କୁ ଚୟନ କରିଥିଲେ । ଉଦୟ ଉତ୍ତର ଜୋନରେ ପଞ୍ଜାବ ପାଇଁ ଖେଳିବା ବେଳେ ଏକ ଇନିଂସରେ ୪୯୭ରନ ସ୍କୋର କରିଥିଲେ । ଯାହାକି ତାଙ୍କ କ୍ୟାରିୟର ରେକର୍ଡ ସ୍କୋର ଥିଲା । ଏହାପରେ ସେ କ୍ରିକେଟରେ ଆଗକୁ ବଢିଚାଲିଥିଲେ । ପରେ ପରେ ୧୯ବର୍ଷରୁ କମ ଦିନିକିଆ ବିଶ୍ୱକପରେ ଭାରତୀୟ ଦଳର ଅଧିନାୟକ ଭାବରେ ମନୋନୀତ ହୋଇଥିଲେ ।
ଏହି ଯୁବ ଖେଳାଳୀ ଗତ ୨ବର୍ଷ ମଧ୍ୟରେ ଆଇସିସି ୧୯ବର୍ଷରୁ କମ ବିଶ୍ୱକପ ୨୦୨୪ର ଅଧିନାୟକ ହେବା ପାଇଁ ଖୁବ କଠିନ ପରିଶ୍ରମ କରିଛନ୍ତି । ୨୦୨୨ରେ ୧୯ବର୍ଷରୁ କମ ବିଶ୍ୱକପରେ ଭାରତୀୟ ଦଳର ରିଜର୍ଭ ଖେଳାଳି ମଧ୍ୟ ଥିଲେ ଉଦୟ , କିନ୍ତୁ ସେ ସେତେବେଳେ ଖେଳିବାର ସୁଯୋଗ ପାଇ ନଥିଲେ।
Comments are closed.