କଲ୍ୟାଣସିଂହପୁର : ରାତିରେ ଗାଁରେ ପଶି ଅଜଣା ଜନ୍ତୁ ୫ଟି ମେଣ୍ଢା ମାରିବା ସହ ୩ଟି ମେଣ୍ଢାଙ୍କୁ ଖଣ୍ଡିଆ ଖାବରା କରିଥିବା ଅଭିଯୋଗ ହୋଇଛି । ଏଭଳି ଘଟଣା ଘଟିଛି ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଳକ ସୁନଖଣ୍ଡି ପଞ୍ଚାୟତର ନନ୍ଦିନି ଗାଁରେ । ନନ୍ଦିନି ଗାଁର ଦୀନବନ୍ଧୁ କାଡ୍ରକା ମେଣ୍ଢା ପାଳନ କରି ପରିବାର ପୋଷଣ କରିଆସୁଥିଲେ । ବର୍ତ୍ତମାନ ମେଣ୍ଢା ଅଜଣା ଜନ୍ତୁର ଶିକାର ହୋଇ ମରିଯାଇଥିବାରୁ ସେ ପରିବାରକୁ କିପରି ଭରଣପୋଷଣ କରିବେ ବୋଲି ଦୁଃଖରେ ଭାଙ୍ଗିପଡିଛନ୍ତି । ଗତ ମାସରେ ୨୫ଟି ମେଣ୍ଢାରୁ ଦଶଟି ମେଣ୍ଢା ଶିକାର କରିଥିଲା ଅଜଣା ଜନ୍ତୁ ।
ବହୁଦିନ ପରେ ପୁଣି ଗତ ରାତ୍ରରେ ଗଙ୍ଗାଧର କାଡ୍ରକାଙ୍କ ୫ଟି ମେଣ୍ଢାକୁ ଅଜଣା ଜନ୍ତୁ ମାରିଦେବା ସହ ୩ଟି ମେଣ୍ଢାକୁ ଆକ୍ରମଣ କରି ଛାଡ଼ିଦେଇଥିଲା । ଏହାକୁ ମେଣ୍ଢା ମାଲିକ ଦେଖି ଗ୍ରାମବାସୀଙ୍କୁ ଜଣାଇଥିଲେ । ଗ୍ରାମବାସୀ ଭୟଭୀତ ହୋଇ ବନବିଭାଗକୁ ସୂଚନା ଦେଇଥିଲେ । ଖବର ପାଇ ବନାଞ୍ଚଳ ଅଧିକାରୀ ଚନ୍ଦନ ଗମାଙ୍ଗ, ବନପାଳ ପ୍ରଦୀପ କୁମାର ଜେନା, ବନରଖି ସୂର୍ଯ୍ୟ ପଟ୍ଟନାୟକ ଘଟଣାସ୍ଥଳରେ ପହଞ୍ଚି ପରିପାର୍ଶ୍ବିକ ସ୍ଥିତି ଯାଞ୍ଚ କରିଥିଲେ । ଏସମ୍ପର୍କରେ ଗଧିଆ କିମ୍ବା ବାଘ ମେଣ୍ଢା ଖାଇଥିବା ସନ୍ଦେହ କରି ରାତିରେ ପେଟ୍ରୋଲିଂ କରି ଜନ୍ତୁକୁ ଠାବ କରାଯିବ ବୋଲି ବନାଞ୍ଚଳ ଅଧିକାରୀ ଚନ୍ଦନ ଗମାଙ୍ଗ ସୂଚନା ଦେଇଛନ୍ତି ।
