ନୂଆଦିଲ୍ଲୀ : ସୋସିଆଲ ମିଡିଆରେ ଜଣେ ଦମ୍ପତିଙ୍କ ଭିନ୍ନ ପ୍ରେମ କାହାଣୀ ସାମ୍ନାକୁ ଆସିଛି। ଯାହାକୁ ଜାଣିବା ପରେ ଆପଣଙ୍କ ଆଖିରୁ ମଧ୍ୟ ଲୁହ ଆସିବ। ଘଟଣା କ୍ରମେ, ଜଣେ ରୋଗଗ୍ରସ୍ତ ମହିଳା ହସ୍ପିଟାଲରେ ହିଁ ନିଜ ପ୍ରେମୀଙ୍କୁ ବିବାହ କରି ନିଜର ଶେଷ ଇଚ୍ଛା ପୂରଣ କରି ଆଖିବୁଜିଲେ। ମାତ୍ର ୧୮ ଘଣ୍ଟା ପରେ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣା ଆମେରିକାର କନେକ୍ଟିକଟ୍ର। ବର୍ତ୍ତମାନ ଏହି ଘଟଣାଟି ଖୁବ୍ ଭାଇରାଲ ହେଉଛି। ତେବେ ଆପଣଙ୍କ ମନକୁ ମଧ୍ୟ ଏହି ପ୍ରଶ୍ନ ଆସୁଥିବ ମହିଳା ଜଣଙ୍କ କେଉଁ ରୋଗରେ ପୀଡିତ ଥିଲେ। ଯାଦ୍ୱାରା ତାଙ୍କର ମୃତ୍ୟୁ ଘଟିଛି। ମହିଳା ଜଣଙ୍କ କର୍କଟ (କ୍ୟାନସର)ରେ ପୀଡିତ ଥିଲେ। ତେଣୁ ହସ୍ପିଟାଲର ଶଯ୍ୟାରେ ହିଁ ନିଜ ପ୍ରେମୀଙ୍କୁ ବିବାହ କରିଥିଲେ।
ମହିଳାଙ୍କ ଏହି ଭିନ୍ନ ଓ ହୃଦୟସ୍ପର୍ଶୀ ଘଟଣାକୁ ପ୍ରଥମେ ଟୁଇଟରେ ପୋଷ୍ଟ କରାଯାଇଥିଲା। ମହିଳାଙ୍କର କ୍ୟାନସର କାରଣରୁ ମୃତ୍ୟୁ ହେବାର କିଛି ଘଣ୍ଟା ପୂର୍ବରୁ ହସ୍ପିଟାଲରେ ହିଁ ତାଙ୍କର ବିବାହ ହୋଇଥିଲା। ୨୯ ଜାନୁଆରୀ ରାତି ୮ଟାରେ ଏହାକୁ ଶେୟାର କରାଯାଇଥିଲା। ପରେ ଏହା ଭାଇରାଲ ହୋଇଥିଲା। ଏପର୍ଯ୍ୟନ୍ତ ୯୦ ଲକ୍ଷରୁ ଅଧିକ ଲୋକେ ଏହାକୁ ଦେଖିସାରିଲେଣି।
ଏହି ପୋଷ୍ଟକୁ ଦେଖିବା ପରେ ଅନେକ ମତ ଦେଇଛନ୍ତି। କେହି କେହି ଲେଖିଛନ୍ତି, କଠିନ ପରିସ୍ଥିତିରେ ଏସବୁ ସାମ୍ନା କରିବା ସହ ଏହା ଗଭୀର ଭଲପାଇବାର ବାର୍ତ୍ତା ଦେଉଛି। କେହି ଲେଖିଛନ୍ତି ଏହା ହୃଦୟବିଦାରକ, ପ୍ରେରଣାଦାୟକ।
ଏହି ପୋଷ୍ଟଟି ଏବେ ଭାଇରାଲ ହେଉଛି। ମାତ୍ର ଏହି ଘଟଣା ୨୨ ଡିସେମ୍ବର ୨୦୧୭। ମହିଳାଙ୍କ ନାମ ହୀଦର ମୋଶର। ହୀଦର ହସ୍ପିଟାଲରେ ଅକ୍ସିଜେନ ମାସ୍କ ପିନ୍ଧି, ବିବାହ ପୋଷାକ ପିନ୍ଧି ହସ୍ପିଟାଲ ଶଯ୍ୟାରେ ହିଁ ବିବାହ କରିଥିଲେ। ମାତ୍ର ୧୮ ଘଣ୍ଟା ପରେ ପରଦିନ ୩୧ ବର୍ଷୀୟ ହୀଦରଙ୍କ ମୃତ୍ୟୁ ହୋଇଥିଲା।
