ଓଡିଶା ବୈଷୟିକ ଓ ଅନୁସନ୍ଧାନ ବିଶ୍ୱବିଦ୍ୟାଳୟରେ କର୍ମଶାଳା ଆୟୋଜିତ

ଡେସ୍କ: ଓଡିଶା ବୈଷୟିକ ଓ ଅନୁସନ୍ଧାନ ବିଶ୍ୱବିଦ୍ୟାଳୟ (ଓୟୁଟିଆର), ଭୁବନେଶ୍ୱରରେ ଆଜି ଫାକଲ୍ଟି ଇଣ୍ଟରାକ୍ସନ କର୍ମଶାଳା ଅନୁଷ୍ଠିତ ହୋଇଯାଇଛି। ଏଥିରେ ନିମନ୍ତ୍ରିତ ବକ୍ତା ଭାବେ ଏମଏନଆଇଟି, ଜୟପୁରର ନିର୍ଦ୍ଦେଶକ ପ୍ରଫେସର ନାରାୟଣ ପ୍ରସାଦ ପାଢ଼ୀ ଯୋଗ ଦେଇଥିଲେ। ସେ ବିଶ୍ୱବିଦ୍ୟାଳୟର ଅଧ୍ୟାପକ, ଅଧ୍ୟାପିକା ଓ ଗବେଷକମାନଙ୍କୁ ଉଦବୋଧନ ଦେଇଥିଲେ। ବିଶ୍ୱବିଦ୍ୟାଳୟର କୁଳପତି ପ୍ରଫେସର ବିଭୁତି ଭୂଷଣ ବିଶ୍ୱାଳଙ୍କ ସଭାପତିତ୍ୱରେ ଆୟୋଜିତ ଏହି କର୍ମଶାଳାରେ, ପ୍ରଫେସର ପାଢ଼ୀ ‘Empowering Renewable Energy Integration: A Smart Grid’ ବିଷୟବସ୍ତୁ ଉପରେ ବକ୍ତବ୍ୟ ପ୍ରଦାନ କରିବା ସହ ଆଇଆଇଟି, ରୁରର୍କିକୁ ଏନର୍ଜି ଏଫିସିଏଣ୍ଟ କ୍ୟାମ୍ପସରେ ପରିଣତ କରିବାରେ ତାଙ୍କ ଭୂମିକା ବିଷୟରେ କହିଥିଲେ। ଭବିଷ୍ୟତରେ ଓଡିଶା ବୈଷୟିକ ଓ ଅନୁସନ୍ଧାନ ବିଶ୍ୱବିଦ୍ୟାଳୟ (ଓୟୁଟିଆର) ଓ ଓଡିଶାକୁ କିଭଳି ସ୍ଵ-ଶକ୍ତି ସମ୍ପନ୍ନରେ ପରିଣତ କରିବା ପାଇଁ ପ୍ରକଳ୍ପ ହାତକୁ ନେଇ ହେବ ଓ ଗବେଷଣା କରିହେବ, ସେ ସମ୍ପର୍କରେ କହିଥିଲେ। ଏହି ଅବସରରେ ପ୍ରଫେସର ପାଢ଼ୀଙ୍କୁ ସମ୍ବର୍ଦ୍ଧନା ଦିଆଯାଇଥିଲା।

ଏହି କର୍ମଶାଳାରେ ୧୫୦ରୁ ଅଧିକ ଅଧ୍ୟାପକ ଓ ଛାତ୍ରଛାତ୍ରୀ ଯୋଗ ଦେଇଥିଲେ। ପ୍ରଫେସର ପ୍ରଭାତ କୁମାର ପାଢ଼ୀ ଓ ପ୍ରଫେସର ଲୋକନାଥ ତ୍ରିପାଠୀ ଏହି କର୍ମଶାଳା ପରିଚାଳନା କରିଥିଲେ।