ଧାନ ଭାଉ
ଉରାଡ଼,୧୦।୧।୩୪: ଏ ଅଞ୍ଚଳରେ ଧାନର ବଡ଼ ଅଭାବ। କିଛିଦିନ ତଳେ ଓଡ଼ିଶା ବନ୍ୟା ସାହାଯ୍ୟ କମିଟି ତରଫରୁ ଧାନ ଗୋଲା ଥିଲା। ତାହା ବନ୍ଦ ହେଲା ଦିନୁ ବେପାରୀମାନେ ଧାନ ଭାଉ ଖୁବ୍ କମ୍ ଦରରେ ବିକୁଛନ୍ତି। ସରକାର ତରଫରୁ ତ’ କାହିଁ କିଛି ସୁର ଶବ୍ଦ ନାହିଁ। ଶୀଘ୍ର ଏ ଅଞ୍ଚଳରେ ଧାନ ଗୋଲା ଖୋଲି ଧାନ ଯୋଗାଇବାର ବ୍ୟବସ୍ଥା କରିବା ଉଚିତ।
ଭୀଷଣ ମୃତ୍ୟୁଲୀଳା
କବାଟ କିଳି ଶୋଇବାର ପରିଣାମ
ଦିଲ୍ଲୀ, ୧୦।୧।୩୪: ଦିଲ୍ଲୀରେ ଆଜିକାଲି ଭୟଙ୍କର ଥଣ୍ଡା ପଡ଼ିଛି। ରାତିରେ ଘର ଭିତରେ ବିଛଣା ତଳେ ନିଆଁ ନ ରଖିଲେ ଶୋଇ ହେଉନାହିଁ। ଗତକାଲି ଗୋଟିଏ ପରିବାରର ଦୁଇଜଣ ସ୍ବାମୀ-ସ୍ତ୍ରୀ ଏବଂ ଝିଅଟିଏ, ଏପରି ୩ଜଣ ଗୋଟିଏ ଘରେ ଶେଯ ପାଖରେ ନିଆଁ ଉମେହୀ ରଖି କବାଟ କିଳି ଶୋଇଥିଲେ। ସକାଳୁ ଦେଖାଗଲା ଯେ ସ୍ତ୍ରୀ ମରିଯାଇଛି। ସ୍ବାମୀ ଏବଂ ଝିଅ ଅଚେତା ହୋଇପଡ଼ିଛନ୍ତି। ସକାଳେ ପଡ଼ିଶା ଘର ଲୋକ ଆସି ଡକାଡକି କରି ସେମାନଙ୍କର କୌଣସି ଶବ୍ଦ ନ ପାଇବାରୁ କବାଟ ଭାଙ୍ଗି ଦେଖିଲେ ଯେ ଏ ଭୀଷଣ କାଣ୍ଡ ଘଟିଛି। ସାଙ୍ଗେସାଙ୍ଗେ ସଦର ବଜାର ଥାନାକୁ ଖବର ଦିଆଗଲା।
ପାରଳାରେ ଲାଟସାହେବ
ପାରଳା, ୧୧।୧।୩୪:ମାନ୍ଦ୍ରାଜର ଲାଟସାହେବ ସାର୍ ଷ୍ଟାନଲି ଗତକାଲି ପାରଳାଖେମୁଣ୍ଡି କଲେଜ ପରିଦର୍ଶନ କରିଥିଲେ। ଆସନ୍ତା କାଲି ଶିକାର ଯିବେ ବୋଲି ପ୍ରକାଶ ପାଇଛି।
Comments are closed.