ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ରାମଚନ୍ଦ୍ରପୁରସ୍ଥିତ ଲକ୍ଷ୍ମୀ ନୃସିଂହ ମନ୍ଦିରର କଲ୍ୟାଣ ମଣ୍ଡପରୁ ଗୁରୁବାର ଜଣେ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି। ମୃତକ ଜଣକ ହେଲେ ବ୍ରହ୍ମପୁର ବ୍ୟାଙ୍କ କୋଲନୀ ବାପୁଜୀ ନଗର ୫ ଲାଇନର ଜିତେନ୍ଦ୍ର କୁମାର ପାଣିଗ୍ରାହୀ(୪୯) ବୋଲି ପୁଲିସ କହିଛି।
ସୂଚନା ପ୍ରକାରେ, ରାମଚନ୍ଦ୍ରପୁରସ୍ଥିତ ଲକ୍ଷ୍ମୀ ନୃସିଂହ ମନ୍ଦିରର କଲ୍ୟାଣ ମଣ୍ଡପର ଛାତ ଉପରେ ଥିବା ସିଡ଼ି ଗ୍ରିଲକୁ ଗାମୁଛା ଦେଇ ବାହାର ପଟେ ଜିତେନ୍ଦ୍ରଙ୍କ ମୃତଦେହ ଝୁଲୁଥିବା ଦେଖି ଲୋକେ ପୁଲିସକୁ ଖବର ଦେଇଥିଲେ। ଖବର ପାଇ ଗୋପାଳପୁର ପୁଲିସ ଘଟଣା ସ୍ଥଳରେ ପହଞ୍ଚି ପରିବାର ଲୋକଙ୍କୁ ଖବର ଦେଇଥିଲେ। ଖବର ପାଇ ଭାଇ ଧର୍ମେନ୍ଦ୍ର କୁମାର ପାଣିଗ୍ରାହୀ ସେଠାରେ ପହଞ୍ଚି ଦେଖିବା ପରେ ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପ୍ରକାରେ ଘଟଣା ସ୍ଥଳରେ ପୁଲିସ ଓ ସାଇଣ୍ଟିଫିକ ଟିମ୍ ପହଞ୍ଚି ତଦନ୍ତ ଆରମ୍ଭ କରିବା ସହ କେସ ନମ୍ବର ୨୭/୨୩ରେ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଛେଦ ନିମନ୍ତେ ବ୍ରହ୍ମପୁର ମେଡିକାଲ ପଠାଯାଇଥିଲା। ବ୍ୟବଛେଦ ଗୃହରେ ମୃତଦେହକୁ ରଖାଯାଇଥିବା ପୁଲିସ କହିଛି। ମୃତକ ଜିତେନ୍ଦ୍ର ଜଣେ ଗାୟକ ସହ ଭଲ ଉଦଘୋଷକ ଭାବେ ପରିଚିତ ଥିଲେ। ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମମାନଙ୍କରେ କାର୍ଯ୍ୟ କରିବା ସହ ଗତ କିଛି ବର୍ଷ ହେଲା ରାମଚନ୍ଦ୍ରପୁର ଅଞ୍ଚଳରେ ରହି ଆସୁଥିଲେ।
