ପିପିଲି : ଜଗତସିଂହପୁର ମଣ୍ଡାସାହିର ବିଶିଷ୍ଟ ଖଣି ବ୍ୟବସାୟୀ ସ୍ୱର୍ଗତ ମାନଗୋବିନ୍ଦ ମହାନ୍ତିଙ୍କ ୧୧୯ତମ ଜୟନ୍ତୀ ଅବସରରେ ମାନଗୋବିନ୍ଦ ମହାନ୍ତି ଚାରିଟେବୁଲ ଟ୍ରଷ୍ଟ ପକ୍ଷରୁ ପିପିଲିର କରିମୂଳ ସ୍ଥିତ ‘ଦି ଟ୍ରଷ୍ଟ ଚିକିତ୍ସା ଅନୁଷ୍ଠାନ’ ପରିସରରେ ଏକ ୧୫ଶଯ୍ୟା ବିଶିଷ୍ଟ ଅତ୍ୟାଧୁନିକ ସଂପ୍ରସାରଣ ଚିକିତ୍ସା କେନ୍ଦ୍ର ଉଦ୍ଘାଟିତ ହୋଇଯାଇଛି । ଏହାକୁ ସ୍ୱର୍ଗତ ମାନଗୋବିନ୍ଦ ମହାନ୍ତିଙ୍କ ନାତୁଣୀ କୁମାରୀ ରୋମୀ ମହାନ୍ତି ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ମାନଗୋବିନ୍ଦ ମହାନ୍ତି ଚାରିଟେବୁଲ ଟ୍ରଷ୍ଟର ପ୍ରତିଷ୍ଠାତା ପଦ୍ମଲୋଚନ ମହାନ୍ତି, ‘ଦି ଟ୍ରଷ୍ଟ ଚିକିତ୍ସା ଅନୁଷ୍ଠାନ’ର ମୁଖ୍ୟ ଡାକ୍ତର ଅଭିଶେଖ ସାମ୍ୟାଲ, ଡାକ୍ତର ଅସିମା ସର୍କେଲ, ଡାକ୍ତର ଅମିତ, ଡାକ୍ତର ଏଲିସା, କମଳଲୋଚନ ମହାନ୍ତି, ପଙ୍କଜଲୋଚନ ମହାନ୍ତି, ତୁଷାର ମହାନ୍ତିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ଏହି ଅବସରରେ ଦେଶର ବିଭିନ୍ନ ଅଞ୍ଚଳର ୩୦ଜଣ ମେରୁଦଣ୍ଡ ଆଘାତପ୍ରାପ୍ତ ରୋଗୀଙ୍କର ମାଗଣା ସ୍ୱାସ୍ଥ୍ୟ ପରୀକ୍ଷା ଓ ମାଗଣା ଚିକିତ୍ସା କରାଯାଇ ସେମାନଙ୍କୁ ସ୍ୱାବଲମ୍ବି କରିବା ପାଇଁ ବିଭିନ୍ନ ପରାମର୍ଶ ଦିଆଯାଇଥିଲା । ଏହା ପୂର୍ବରୁ ଟ୍ରଷ୍ଟ ପକ୍ଷରୁ ସେଠାରେ ଏକ ଅତ୍ୟାଧୁନିକ ରିହାବ୍ ଆକ୍ଟିଭିଟି କେନ୍ଦ୍ର ମଧ୍ୟ ସ୍ଥାପନ କରାଯାଇଛି । ଏହି ଅବସରରେ ଡ଼ଃ ସୃତି ମହାପାତ୍ରଙ୍କ ‘ସ୍ୱାଭିମାନ’ ସଂସ୍ଥା ପକ୍ଷରୁ ମେରୁଦଣ୍ଡ ଆଘାତ ରୋଗୀଙ୍କୁ ନେଇ ଏକ ସଚେତନତା କାର୍ଯ୍ୟକ୍ରମ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
Comments are closed.