ଡେସ୍କ: ଉତ୍ତରାଖଣ୍ଡର ସିଲ୍କ୍ୟାରାଠାରେ ସୁଡ଼ଙ୍ଗରେ ଫସି ରହିଥିବା ଶ୍ରମିକଙ୍କ ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଜାରି ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ରିଲିଫ ଓ ଉଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି। ମୋଦୀ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମୀଙ୍କ ସହ ଫୋନରେ କଥା ହୋଇଛନ୍ତି। ସୁଡ଼ଙ୍ଗ ଭିତରେ ଫସି ରହିଥିବା ଶ୍ରମିକମାନଙ୍କ ଉଦ୍ଧାର କାର୍ଯ୍ୟକୁ ପ୍ରାଥମିକତା ଦିଆଯାଉଥିବା ପ୍ରଧାନମନ୍ତ୍ରୀ କହିଛନ୍ତି। ତେବେ ଆଜି ଉଦ୍ଧାର କାର୍ଯ୍ୟ ଜୋରଦାର କରାଯାଇଛି ଏବଂ ଘଟଣା ଘଟିଥିବା ସୁଡ଼ଙ୍ଗର ଉପର ଅଂଶରୁ ମେସିନ ସାହାଯ୍ୟରେ ଖୋଲିବା କାର୍ଯ୍ୟ ଆରମ୍ଭ କରାଯାଇଛି।
ଅନ୍ୟପକ୍ଷରେ, ଶ୍ରମିକ ମାନେ ଫସି ରହିଥିବା ସ୍ଥାନକୁ ଏକ ଏନ୍ଡୋସ୍କୋପିକ କ୍ୟାମେରା ସଫଳ ଭାବେ ପଠାଯାଇଛି। ସେହି କ୍ୟାମେରା ସାହାଯ୍ୟରେ ଶ୍ରମିକମାନଙ୍କ ସହ କଥାବାର୍ତ୍ତା କରିବା ଓ ସେମାନଙ୍କୁ ଦେଖିବା ସମ୍ଭବ ହୋଇଛି। ଉଦ୍ଧାରକାରୀ ଦଳ ସୁଡ଼ଙ୍ଗ ମଧ୍ୟକୁ ୬ ଇଞ୍ଚ ଗୋଲେଇ ବିଶିଷ୍ଟ ପାଇପ ଭର୍ତ୍ତି କରିବାରେ ସକ୍ଷମ ହୋଇଛନ୍ତି। ସେହି ପାଇପ ଜରିଆରେ ଆବଶ୍ୟକ ଖାଦ୍ୟ, ପାନୀୟ ଜଳ, ଅମ୍ଳଜାନ ଓ ଔଷଧ ପଠାଯାଉଛି।
