କାମାକ୍ଷାନଗର : କାମାକ୍ଷାନଗର ଉପଖଣ୍ଡ କଙ୍କଡାହାଡ଼ ଥାନା ମରୁଆବିଲି ପଞ୍ଚାୟତ ଅନ୍ତର୍ଗତ ବଳଦିଆପାଳ ଗ୍ରାମରେ ସୋମବାର ଅପରାହ୍ନରେ ଏକ ୫ ବର୍ଷର ଶିଶୁ ଖେଳୁଥିଲା ବେଳେ କୂଅରେ ପଡି ମୃତ୍ୟୁ ହୋଇଥିବା ଜଣାଯାଇଛି। ମୃତ ଶିଶୁ ଜଣକ ଗ୍ରାମର ବିଷକେତନ ମହାନ୍ତଙ୍କର ୫ ବର୍ଷର ପୁଅ ବାପୁନି ମହାନ୍ତ। ସୂଚନା ଅନୁଯାୟୀ ବାପୁନି ଆଜି ବିଦ୍ୟାଳୟରୁ ଫେରିବା ପରେ ଘର ପାଖରେ ଖେଳୁଥିଲା। ଖେଳୁଥିଲା ବେଳେ ସେ କୂଅରେ ଖସି ପଡିଥିଲା। ପୁଅକୁ ବହୁ ଖୋଜାଖୋଜି କରି ପରିବାର ଲୋକ କୂଅରୁ ଉଦ୍ଧାର କରି କାମାକ୍ଷାନଗର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ବାପୁନିକୁ ମୃତ ଘୋଷଣା କରିଥିଲେ। ଏହି ଖବର ପ୍ରଚାର ହେବା ପରେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି। ପୁଲିସ ପକ୍ଷରୁ ଶିଶୁର ମୃତଦେହ ଜବତ ପରେ ବ୍ୟବଛେଦର ବ୍ୟବସ୍ଥା କରିଥିବାର ଜଣାଯାଇଛି।
Comments are closed.