କାମାକ୍ଷାନଗର: କାମାକ୍ଷାନଗର ବ୍ଲକରେ ସ୍ୱଛତା ମିଶନରେ ପାଇଖାନା ହୋଇଥିବା ବେଳେ ସଚେତନତା ଅଭାବରୁ ଏବେ ତାହା ପ୍ରହସନରେ ପରିଣତ ହୋଇଥିବା ଅନୁଭୂତ ହେଉଛି। କାମାକ୍ଷାନଗର ବ୍ଲକର ୨୨ ଗୋଟି ପଂଚାୟତରେ ସ୍ୱଛତା ମିଶନ ସହାୟତାରେ ପ୍ରତ୍ୟେକ ଘରେ ପାଇଖାନା ନିର୍ମାଣ କରାଯାଇଛି। ହେଲେ ସେ ପାଇଖାନା ନିର୍ମାଣରେ କେତେକ ଅନିୟମିତତା ଏବଂ ନିର୍ମାଣ ହୋଇଥିବା ପାଇଖାନା ବ୍ୟବହାର ନ କରାଯାଇ ସେଥିରେ ଘରର ଦରକାରୀ ସରଞ୍ଜାମ ରଖୁଥିବା ବେଳେ ବାହାରକୁ ଶୌଚ ପାଇଁ ଢାଳ ଧରି ଯାଉଥିବା ଦେଖାଯାଉଛି। ମୁଖ୍ୟତଃ ଏହି ବ୍ଲକର ଅଧ୍ୟକ୍ଷ ପ୍ରେମାନନ୍ଦ ସାହୁଙ୍କ ନିଜ ଗ୍ରାମରେ ପାଇଖାନା ନିର୍ମାଣ କରାଯାଇଥିବା ବେଳେ ଗ୍ରାମର ଅଧିବାସୀମାନେ ପାଇଖାନା ବ୍ୟବହାର ନକରି ବାହାରେ ଥିବା ବୁଦୁବୁଦିଅ ଜଙ୍ଗଲକୁ ଢାଳ ଧରି ଯାଉଥିବାର ଦେଖାଯାଉଛି। ଖୋଦ ବ୍ଲକ ଅଧ୍ୟକ୍ଷଙ୍କ ଗ୍ରାମରେ ଲୋକେ ପାଇଖାନା ବ୍ୟବହାର କରୁ ନଥିବା ବେଳେ ଅନ୍ୟ ପଂଚାୟତରେ ଲୋକେ କିପରି ପାଇଖାନା ବ୍ୟବହାର କରୁଥିବେ ତାହା ସାଧାରଣରେ ଏବେ ଚର୍ଚ୍ଚାର ବିଷୟ ହୋଇଛି। ଜିଲ୍ଲାପାଳ ଏଥିପ୍ରତି ଗୁରୁତ୍ୱ ଦେଇ ତ୍ୱରିତ ପଦକ୍ଷେପ ନେବା ପାଇଁ ସଚେତନ ନାଗରିକ ମହଲରେ ଦାବୀ ହୋଇଛି।
Comments are closed.