ଆଠଗଡ : ଗୁରୁଡିଝାଟିଆ ଥାନା ଅନ୍ତର୍ଗତ କୁଶପଙ୍ଗି ନିକଟ କନ୍ଦର୍ପ ଛକଠାରେ ଜାତୀୟ ରାଜପଥରେ ଡକାୟତି ପାଇଁ ପ୍ରସ୍ତୁତ ହେଉଥିବା ଏକ ଡକାୟତ ଦଳର ଜଣେ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି କାରାଦଣ୍ଡରେ ଦଣ୍ଡିତ କରାଯାଇଥିବା ଜଣାପଡିଛି। ୧୯୯୯ ମସିହା ଜୁନ ୨୦ତାରିଖ ରାତିରେ ଡକାୟତି କରିବା ପାଇଁ ପ୍ରସ୍ତୁତ ହେଉଥିବା ଏକ ଡକାୟତ ଦଳକୁ ଗୁରୁଡିଝାଟିଆ ଥାନାର ତତ୍କାଳୀନ ଆଇଆଇସି ସୁଦାମ ଚରଣ ସାହୁ ସଦଳବଳେ କାବୁ କରିଥିଲେ। ଏହି ଡକାୟତି ଦଳର ୫ଜଣଙ୍କ ମଧ୍ୟରୁ ପୁଲିସ ୪ଜଣ ପୁନା ଲାଙ୍ଗୁଡି, ଲୋକନାଥ ସ୍ୱାଇଁ, କାସିମ ଖାଁ, କ୍ଷୀରୋଦ ଦେଉରୀଙ୍କୁ ଗିରଫ କରିଥିବାବେଳେ ବିପିନ ମଲ୍ଲିକ ସେହି ଦିନଠାରୁ ଫେରାର ହୋଇଯାଇଥିଲା। ଗିରଫ ଅଭିଯୁକ୍ତଙ୍କୁ ଗତ ୨୦୧୨ ମାର୍ଚ୍ଚ ୩ତାରିଖରେ ଅଦାଲତ ଦୋଷୀ ସାବ୍ୟସ୍ତ କରି ଦଣ୍ଡ ବିଧାନ କରିସାରିଛନ୍ତି । ତେବେ ନିକଟରେ ଫେରାର ଥିବା ଅଭିଯୁକ୍ତ ବିପିନ ମଲ୍ଲିକଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିବା ସହ ତା ନାମରେ ଅଭିଯୋଗ ଫର୍ଦ୍ଦ ସହକାରୀ ଦୌରାଜଜ୍ଙ୍କ ଅଦାଲତରେ ଦାଖଲ କରିଥିଲେ। ମାମଲାଟିର ବିଚାର କରି ସହକାରୀ ଦୌରାଜଜ୍ ମହାଶ୍ୱେତା ପରିଜା ସଂପୃକ୍ତ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ବୁଧବାର ତାଙ୍କ ରାୟ ପ୍ରକାଶ କରିଛନ୍ତି। ସଂପୃକ୍ତ ଅଭିଯୁକ୍ତକୁ ୨ବର୍ଷ ସଶ୍ରମ କାରାଦଣ୍ଡ ଓ ୨୦୦୦ଟଙ୍କା ଜୋରିମନା ଅନାଦେୟ ଅଧିକ ଦୁଇମାସ କାରାଦଣ୍ଡ ଭୋଗିବା ପାଇଁ ଆଦେଶ ଦେଇଥିବା ଜଣାପଡିଛି । ମାମଲାଟିକୁ ସରକାରଙ୍କ ପକ୍ଷରୁ ଅତିରିକ୍ତ ପିପି ସଂଜୟ କୁମାର ଦାସ ପରିଚାଳନା କରିଥିଲେ।
Comments are closed.