ଚୋରି ସାମଗ୍ରୀ ଜବତ, ୪ ଗିରଫ

ପିପିଲି : ପିପିଲି ନିକଟବର୍ତ୍ତି ଦାଣ୍ଡମୁକୁନ୍ଦପୁର ଦେଉଳସାହିର ବାସିନ୍ଦା ସ୍ୱରାଜ ରଥଙ୍କ ଘରୁ ହୋଇଥିବା ଚୋରି ଘଟଣାରେ ପିପିଲି ପୁଲିସ ୪ଜଣ ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ସମସ୍ତ ଚୋରି ସାମଗ୍ରୀକୁ ଜବତ କରିବାରେ ସଫଳ ହୋଇଛି । ଗିରଫ ଅଭିଯୁକ୍ତମାନେ ହେଲେ ଦାଣ୍ଡମୁକୁନ୍ଦପୁର ଅଞ୍ଚଳର ଚନ୍ଦନ ବେହେରା (୨୬), ମାଳିବରାହି ଗ୍ରାମର ପ୍ରକାଶ ବେହେରା ଓରଫ ଗୁଡୁ (୩୦), ଦାଣ୍ଡମୁକୁନ୍ଦପୁର ବଜାରସାହିର ସୁରେଶ କୁମାର ସାହୁ ଓରଫ ବାୟା (୨୬) ଓ ବାସୁଦେଇପୁର ଗ୍ରାମର ଜଗବନ୍ଧୁ ଦାସ ଓ ବବୁଲୁ (୩୫)।
ସୂଚନା ଅନୁଯାଇ, ସ୍ୱରାଜ ରଥ ଗତ ୨ ତାରିଖ ଦିନ ନିଜ ଘରକୁ ତାଲା ପକାଇ ରଣପୁର ଯାଇଥିବା ବେଳେ ୪ ତାରିଖରେ ଘରକୁ ଫେରିଥିଲେ। ସିଡିଘରର ଟିଣକୁ ତାଡି କେତେକ ଦୁର୍ବୁତ୍ତ ତାଙ୍କ ଘର ମଧ୍ୟରେ ପ୍ରବେଶ କରି ଘରେ ଥିବା ଇନ୍‌‌ଭର୍ଟର ମେସିନ, ବ୍ୟାଟେରୀ, ପାଣିମୋଟର, ଟୁଲ୍‌‌କିଟ୍‌‌ ବାକ୍ସ ଓ ଘରେ ଥିବା ଷ୍ଟ୍ରିଟ୍‌‌ ଲାଇଟ୍‌‌ ଆଦିକୁ ଚୋରି କରିନେଇଥିବା ସେ ଜାଣିବାକୁ ପାଇଥିଲେ । ଏ ସଂପର୍କରେ ସେ ନିଜେ ଅନୁସନ୍ଧାନ କରିବାରେ ଉପରୋକ୍ତ ୪ ଅଭିଯୁକ୍ତ ତାଙ୍କ ଘରୁ ଚୋରି କରିଥିବାର ସେ ବିଶ୍ୱସ୍ତ ସୂତ୍ରରୁ ଜାଣିବାକୁ ପାଇଥିଲେ । ଏ ସଂପର୍କରେ ଗତ ୬ ତାରିଖରେ ସେ ପିପିଲି ଥାନାରେ ଲିଖିତ ଅଭିଯୋଗ କରିଥିଲେ। ଆଇଆଇସି ଦୀପକ କୁମାର ଖଣ୍ଡାୟତରାୟଙ୍କ ନିର୍ଦ୍ଦେଶରେ ଏଏସ୍‌‌ଆଇ ମନୋରଞ୍ଜନ ପରିଡା ଘଟଣାର ତଦନ୍ତ କରିବା ସହ ଉପରୋକ୍ତ ୪ ଅଭିଯୁକ୍ତଙ୍କୁ ଗିରଫ କରି ସେମାନଙ୍କ ନିକଟରୁ ସମସ୍ତ ଚୋରି ସାମଗ୍ରୀକୁ ଜବତ କରିବାରେ ସଫଳ ହୋଇଥିଲେ। ଗିରଫ ଅଭିଯୁକ୍ତମାନଙ୍କୁ ପୁଲିସ ବୁଧବାର କୋର୍ଟ ଚାଲାଣ କରିଛି।