ନୂଆଦିଲ୍ଲୀ: ଅନୀଲ ଅମ୍ବାନୀଙ୍କ ରିଲାଏନ୍ସ ଗ୍ରୁପ ଗଣମାଧ୍ୟମ ଉପରେ ମାନହାନି ମାମଲାରେ ରେକର୍ଡ଼ ସୃଷ୍ଟି କରିଛି। ଅକ୍ଟୋବରରେ ରାଫେଲ ଚୁକ୍ତି ପ୍ରସଙ୍ଗକୁ ନେଇ ମାନହାନି ମାମଲା ପରେ ରିଲାଏନ୍ସ ଗ୍ରୁପକୁ ନେଇ ଚର୍ଚ୍ଚା ଜୋର ଧରିଲା। ଭାରତୀୟ ବିଚାର ବିଭାଗୀୟ ବ୍ୟବସ୍ଥାରେ ଗଣମାଧ୍ୟମ ଉପରେ ଏତେ ପରିମାଣରେ ମାନହାନି ମାମଲା ରୁଜୁ କରି ରିଲାଏନ୍ସ ରେକର୍ଡ଼ କରିଛି। କୋର୍ଟରୁ ମିଳିଥିବା ତଥ୍ୟ ଅନୁଯାୟୀ ଜାନୁଆରୀ ୨୦୧୮ରୁ ଅଦ୍ୟାବଧି ରିଲାଏନ୍ସ କମ୍ପାନୀ ରାଫେଲ ପ୍ରସଙ୍ଗରେ ୨୮ଟି ମାମଲା ଅହମ୍ମଦାବାଦ କୋର୍ଟରେ ରୁଜୁ କରିଛି। କେବଳ ଗଣମାଧ୍ୟମ ଉପରେ ରାଫେଲ ପ୍ରସଙ୍ଗରେ ୨୦ଟି ମାମଲା ରୁଜୁ ହୋଇଛି।
ଏହି ମାନହାନି ମାମଲାରେ ଭାରତୀୟ ଗଣମାଧ୍ୟମ ସମେତ ବିଦେଶୀ ଗଣମାଧ୍ୟମ ମଧ୍ୟ ସାମିଲ ରହିଛନ୍ତି। “ଦି ଇକନୋମିକ୍ସ ଟାଇମ୍ସ’, “ଦି ଫାଇନାନ୍ସିଆଲ ଟାଇମ୍ସ, “ଦି ଫାଇନାନ୍ସିଆଲ ଏକ୍ସପ୍ରେସ, ଦି ୱିକ୍, “ଦି ଟ୍ରିବ୍ୟୁନ୍’, ‘ଦି ୱାର’ ସମେତ ଭାରତୀୟ ଗଣମାଧ୍ୟମ ଏନଡିଟିଭି ଉପରେ ୧୦ହଜାର କୋଟିର ମାନହାନି ମକଦ୍ଦୋମା କରାଯାଇ ଥିବାବେଳେ ‘ଦ ସିଟିଜେନ’ ବିରୋଧରେ ୭ହଜାର କୋଟିର ମାନହାନି ମୋକଦ୍ଦମା ରୁଜୁ କରାଯାଇଛି। ସେହିପରି ‘ଦ ୱାୟର’ ଉପରେ ୬ହଜାର କୋଟିର ମାନହାନି ମାମଲା ରୁଜୁ କରାଯାଇଛି।
