୧୧,୯୦୦ ଲିଟର ପୋଚ ଓ ୧୨୫୮ ଲିଟର ଦେଶୀ ମଦ ଜବତ, ୩ ଚୋରା ମଦ ବେପାରୀ ଗିରଫ

କଟକ ଜିଲ୍ଲା ଅବକାରୀ ଅଧୀକ୍ଷକ ଦେବାଶିଷ ପଟେଲଙ୍କ ନିର୍ଦ୍ଦେଶକ୍ରମେ  ଆଠଗଡ଼ ଅବକାରୀ ଉପ ଅଧିକ୍ଷକ ପ୍ରମୋଦ କୁମାର ପଣ୍ଡାଙ୍କ ତତ୍ତ୍ଵାବଧାନରେ ତିଗିରିଆ  ଥାନା ଅନ୍ତର୍ଗତ ଭିରୁଡା (ପଣସପାଟଣା) ଓ ରେଙ୍ଗାଲି କେନାଲ ଅଞ୍ଚଳରେ ଅବକାରୀ ବିଭାଗ ପକ୍ଷରୁ ମିଳିତ ଭାବେ ଚଢାଉ କରାଯାଇ ୧୧,୯୦୦ ଲିଟର  ଗୁଡ ପୋଚ ଓ ୧୦୫୦ ଲିଟର ରନ୍ଧା ଦେଶୀ ମଦ, ଏବଂ ବିଭିନ୍ନ ମଦ ରନ୍ଧା ଉପକରଣ ଜବତ କରାଯାଇଛି ଯାହାର ଆନୁମାନିକ ମୂଲ୍ଯ ୭ ଲକ୍ଷ ଟଙ୍କା ହେବ। ସେହିପରି ପାଞ୍ଚଗାଁ ଓ ଅଚଳକୋଟ ଗ୍ରାମରେ ଚଢାଉ କରାଯାଇ ୨୦୮ ଲିଟର ଦେଶୀ ମଦ ଓ ୫.୨ ଲିଟର ବିଦେଶୀ ମଦ ଜବତ କରିବା ସହ ୩ ଜଣ ଚୋରା ମଦ ବ୍ଯବସାୟଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଅଭିଯୁକ୍ତ ମାନେ ହେଲେ ବିଚିତ୍ରାନନ୍ଦ ସାହୁ, ଚୈତନ୍ୟ ଜେନା ଓ  ଚଞ୍ଚି ଜେନା।  ଏହି ଚଢାଉରେ  ଆଠଗଡ଼ ଅବକାରୀ ନିରୀକ୍ଷକ କେଶବ ଚନ୍ଦ୍ର ଦାସ,  ଆଠଗଡ଼ ଅବକାରୀ ଉପ ନିରୀକ୍ଷକ ସୌମ୍ୟ ରଂଜନ ମାଝୀ, ଓ ଅବକାରୀ ଉପ ନିରୀକ୍ଷକ ସନାତନ ବେହେରା, ସନ୍ତୋଷ ମହାରଣା, ତିଗିରିଆ ଥାନା ଏ ଏସ ଆଇ ପ୍ରଦୀପ କୁମାର ବେହେରା ପ୍ରମୁଖଙ୍କ ସହିତ ଅବକାରୀ ବିଭାଗର କର୍ମଚାରୀମାନେ ଅଂଶଗ୍ରହଣ କରିଥିଲେ।