ଗୋପାଳପୁର : ପ୍ରାୟ ୧୬ କୋଟି ବ୍ୟୟରେ ନାରାୟଣପୁର-ହରିପୁର ରାସ୍ତା ପୂର୍ତ୍ତ ବିଭାଗ ଡିଭିଜନ-୨ ପକ୍ଷରୁ ନିର୍ମାଣ ହୋଇଥିବା ସେତୁରେ ଫାଟ ସୃଷ୍ଟି ନେଇ ଖବର ପ୍ରକାଶିତ ହେବା ପରେ ସୋମବାର ବିଭାଗ ପକ୍ଷରୁ ଫାଟ ସୃଷ୍ଟି ହୋଇଥିବା ସ୍ଥାନରେ ମରାମତି କାମ ଆରମ୍ଭ କରାଯାଇଥିବା ଦେଖିବାକୁ ମିଳିଛି । ଅନ୍ୟ ପଟେ ବ୍ରିଜକୁ ସଂଯୋଗ କରୁଥିବା ରାସ୍ତା ମଧ୍ୟ ପ୍ରାୟ ୧୦ ଇଞ୍ଚ ଦବି ଯାଇଥିବା ବେଳେ ଆଜି ଏହାର ମଧ୍ୟ ମରାମତି କାର୍ଯ୍ୟ ଆରମ୍ଭ ହୋଇଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ ଯେ, ସେତୁ ନିର୍ମାଣ ପାଇଁ ଠିକା ନେଇଥିବା ଠିକାଦାର ପକ୍ଷରୁ ସଠିକ ଭାବେ ସେତୁ ନିର୍ମାଣ ସହ ସେତୁକୁ ସଂଯୋଗ କରୁଥିବା ରାସ୍ତା ନିର୍ମାଣ କରିନଥିବାରୁ ଏବେ ସେତୁରେ ଫାଟ ସୃଷ୍ଟି ହେବା ସହ ରାସ୍ତା ମଧ୍ୟ ଦବି ଯିବା ଭଳି ପରିସ୍ଥିତି ସୃଷ୍ଟି ହୋଇଛି । ଅନ୍ୟ ପଟେ ସେତୁର ମରାମତି କାମ ହେଉଥିବା ବେଳେ ଠିକାଦାର ପକ୍ଷରୁ ବ୍ରିଜ ଉପରେ ବାଲି ଓ ଚିପ୍ସ ଗଦା କରାଯାଇଛି । କିନ୍ତୁ ଉକ୍ତ ରାସ୍ତା ଅନ୍ଧାରୁଆ ରହୁଥିବାରୁ ଦୁର୍ଘଟଣା ଘଟିବାର ସମ୍ଭାବନା ରହିଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।ଖବର ପ୍ରକାଶନ ପରେ ଆଜି ପୂର୍ତ୍ତ ବିଭାଗର କୌଣସି ପଦାଧିକାରୀ ଘଟଣାସ୍ଥଳ ପରିଦର୍ଶନ କରିନଥିବା ବେଳେ ଠିକାଦାରଙ୍କ ପକ୍ଷରୁ ମରାମତି କାମ ଆରମ୍ଭ କରାଯାଇଥିବା ଅଞ୍ଚଳ ବାସୀ କହିଛନ୍ତି । ସୂଚନାଯୋଗ୍ୟ, ଗତ ୨୦୧୮ ଡିସେମ୍ବର ମାସରେ ଏହି ସେତୁ ନିର୍ମାଣ ନିମନ୍ତେ ଶୁଭ ଦିଆଯିବା ସହ ନିର୍ମାଣ କାମ ଆରମ୍ଭ ହୋଇଥିଲା । ଏବେ ସୁଦ୍ଧା ଏହାର କାମ ସରିନଥିବା ବେଳେ ସେତୁରେ ଫାଟ ସହ ରାସ୍ତା ଦବିବା ଘଟଣା ପରେ ଏହି କାମର ସ୍ଥାୟୀତ୍ବ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
