ଆଠଗଡ଼: କଟକ ଜିଲ୍ଲାର ଅନ୍ୟତମ ପୁରାତନ ଓ ଐତିହ୍ୟ ସଂପନ୍ନ ଉଚ୍ଚ ଶିକ୍ଷାନୁଷ୍ଠାନ ଗୋପବନ୍ଧୁ ବିଜ୍ଞାନ କଲେଜର ୬୧ତମ ପ୍ରତିଷ୍ଠା ଦିବସ ଶନିବାର ପାଳିତ ହୋଇଯାଇଛି। କଲେଜର ଦୃଶ୍ୟଶ୍ରାବ୍ୟ ପ୍ରେକ୍ଷାଗୃହରେ କଲେଜର ଅଧ୍ୟକ୍ଷ ଡଃ ଲୋକନାଥ ସାହୁଙ୍କ ପୌରୋହିତ୍ୟରେ ଆୟୋଜିତ ଏହି ଉତ୍ସବରେ ଡେପ୍ୟୁଟି କଲେକ୍ଟର ତଥା ଭାରପ୍ରାପ୍ତ ଉପଜିଲ୍ଲାପାଳ ଦିପ୍ତୀମୟୀ ବେହେରା ମୁଖ୍ୟଅତିଥି ଭାବେ ଯୋଗଦେଇ ଛାତ୍ରଛାତ୍ରୀମାନେ ପ୍ରତିଯୋଗିତାମୂଳକ ମନୋଭାବ ଓ ଜ୍ଞାନ ଆହରଣର ଜିଜ୍ଞାସା ନେଇ ଶିକ୍ଷା ଗ୍ରହଣ କଲେ ସଫଳତା ଅବଶ୍ୟମ୍ଭାବୀ ବୋଲି ମତବ୍ୟକ୍ତ କରିଥିଲେ। ଶିକ୍ଷା ସହିତ ବିଦ୍ୟାର୍ଥୀ ଭବିଷ୍ୟତରେ ଜଣେ ଜଣେ ଭଲ ମଣିଷ ହେବା ଆବଶ୍ୟକ ବୋଲି ସେ ମତପୋଷଣ କରିଥିଲେ।
ଏଥିରେ ସମ୍ମାନିତ ଅତିଥି ଭାବେ ଶିକ୍ଷକ ସଂଘର ସଂପାଦିକା ଅଧ୍ୟାପିକା ଦମୟନ୍ତୀ ପରିଡ଼ା, ସଭାପତି ପ୍ରତାପ କେଶରୀ ଖାଟୋଇ, ପ୍ରତିଷ୍ଠା ଦିବସ ପାଳନ କମିଟି ସଂଯୋଜକ ଅଧ୍ୟାପିକା ଡଃ ଗାୟତ୍ରୀ ତ୍ରିପାଠୀ, ଅଧ୍ୟାପକ ଗୌତମବୁଦ୍ଧ ସୀତାରାମ ପ୍ରମୁଖ ଉତ୍କଳମଣି ପଣ୍ଡିତ ଗୋପବନ୍ଧୁଙ୍କ ନାମରେ ନାମିତ ଏହି ମହାବିଦ୍ୟାଳୟର ପ୍ରତ୍ୟେକ ଛାତ୍ରଛାତ୍ରୀ ନିଜକୁ ଗର୍ବିତ ଅନୁଭବ କରିବା ସହ ଗୋପବନ୍ଧୁଙ୍କ ଆଦର୍ଶରେ ଅନୁପ୍ରାଣିତ ହେବା ଲାଗି ପରାମର୍ଶ ଦେଇଥିଲେ। ପ୍ରାରମ୍ଭରେ ମୁଖ୍ୟଅତିଥି ଶ୍ରୀମତୀ ବେହେରା, କଲେଜ ଅଧ୍ୟକ୍ଷ ଡଃ ସାହୁ ଓ ଅନ୍ୟ ଅଧ୍ୟାପକ ଅଧ୍ୟାପିକା କଲେଜ ପରିସରରେ ପ୍ରତିଷ୍ଠିତ ଉତ୍କଳମଣି ପଣ୍ଡିତ ଗୋପବନ୍ଧୁ ଓ ତାଙ୍କ ପ୍ରିୟ ଶିଷ୍ୟ ତଥା କଲେଜର ପ୍ରତିଷ୍ଠାତା ପଦ୍ମଭୂଷଣ ଡଃ ରାଧାନାଥ ରଥଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ। ସକାଳେ କଲେଜର ଏନଏସଏସ, ଏନସିସି, ଯୁବ ରେଡକ୍ରସ ଏବଂ ସ୍କାଉଟ ଗାଇଡ ପକ୍ଷରୁ କଲେଜ ପରିସରରେ ବ୍ୟାପକ ଚାରା ରୋପଣ କରାଯାଇଥିଲା। ଏହି ଅବସରରେ +୩ ଓ +୨ର ଶ୍ରେଷ୍ଠ ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧିତ କରାଯାଇଥିଲା। ଅଧ୍ୟାପକ ପ୍ରଣବ ଦାସ, ଦେବାଶିଷ ପଟ୍ଟନାୟକ, ଦେବେଶ ନନ୍ଦନ ରଥ, ଲଳିତେନ୍ଦୁ ପଟ୍ଟନାୟକ, ଦେବାଶିଷ ସାହୁ, ସିନ୍ମୟ ସାହୁ, ଡଃ ଚିତ୍ରସେନ ରାଉତ, ଡଃ ଦିବ୍ୟଶକ୍ତି ସାମନ୍ତରାୟ, ସତ୍ୟରଞ୍ଜନ ପ୍ରଧାନ, ସୌମ୍ୟକାନ୍ତ ସେନାପତି, ଯଶରଞ୍ଜନ ପୋଢ, ଅମିତ୍ କୁମାର ଭୋଷ, ଅନିରୁଦ୍ଧ ସେନାପତି, ଅଧ୍ୟାପିକା ସସ୍ମିତା ଖାଲକୋ, ସୁଶ୍ରୀ ସେନାପତି, ସସ୍ମିତା ହୋତା ପ୍ରମୁଖ ଚାରା ରୋପଣ ସହିତ ପ୍ରତିଷ୍ଠା ଉତ୍ସବ ପରିଚାଳନାରେ ସହଯୋଗ କରିଥିଲେ। ଶେଷରେ ଅଧ୍ୟାପକ ଡଃ ଚିତ୍ତରଞ୍ଜନ ପଟ୍ଟନାୟକ ଧନ୍ୟବାଦ ଅର୍ପଣ କରିଥିଲେ।
