ଧାମରା: ଅବିଶ୍ରାନ୍ତ ବର୍ଷାରେ ଧାମରା ଅଂଚଳ ବର୍ଷାଜଳରେ ଉବୁଟୁବୁ। ଅବିଶ୍ରାନ୍ତ ବର୍ଷାରେ ଧାମରା ଅଂଚଳରେ ଏକ ଅଭାବନୀୟ ପରିସ୍ଥିତିରେ ସୃଷ୍ଟି ହୋଇଛି। ଧାମରାରେ ମାଟି କାନ୍ଥ ପଡ଼ି ଯିବାରୁ ସ୍ବାମୀଙ୍କ ମୃତ୍ୟୁ ହୋଇଯାଇଥିବାବେଳେ ସ୍ତ୍ରୀ ଗୁରୁତର ଆହତ ହୋଇଥିବା ଜଣାପଡ଼ିଛି। ସ୍ୱାମୀ ମାଟି କାନ୍ଥ ତଳେ ଚାପି ହୋଇ ମୃତ୍ୟୁ ବରଣ କରିଥିଲେ ଏବଂ ସ୍ତ୍ରୀ ଗୁରୁତର ମୃତ୍ୟୁ ସହ ସଂଘର୍ଷ କରୁଛନ୍ତି ବୋଲି କରଞ୍ଜମା ଫାଣ୍ଡି ଅଧିକାରୀ ବି ଏନ ହେମ୍ବ୍ରମ ପ୍ରକାଶ କରିଛନ୍ତି। ଆଜିର ଏହି ଅବିଶ୍ରାନ୍ତ ବର୍ଷା ସମୟରେ କରଣପଲ୍ଲୀ ପଞ୍ଚାୟତରେ ଏକ ମାଟି(କଚ୍ଚା) ଘରେ ରହୁଥିବା କୁମୁଦ ମଣ୍ଡଳ(୮୧) ଙ୍କ ଘରେ ବର୍ଷା ପାଣି ଜମି ଯାଇଥିଲା।
ଏହି ସମୟରେ କୁମୁଦ ଏବଂ ତାଙ୍କ ସ୍ତ୍ରୀ ନିହାରିକା ମଣ୍ଡଳ ନିଜ ଘରେ ଜମି ଥିବା ବର୍ଷା ପାଣିକୁ ଘରୁ ନିଷ୍କାସନ କରୁଥିଲେ। ଏହି ସମୟରେ ସଂପୂର୍ଣ ଓଦା ହୋଇଥିବା ମାଟି କାନ୍ଥ ଭୁଷୁଡି ପଡିବାରୁ ସ୍ବାମୀ କାନ୍ଥ ତଳେ ଚାପି ହୋଇଯାଇଥିଲେ। କୁମୁଦଙ୍କ ସ୍ତ୍ରୀ ନିହାରିକାଙ୍କ ଉପରେ ମାଟି କାନ୍ଥ ପଡିଥିବା ବେଳେ ତାଙ୍କୁ ପଡୋଶୀ ଉଦ୍ଧାର କରିଥିଲେ। କୁମୁଦଙ୍କୁ ମଧ୍ୟ ଉଦ୍ଧାର କରିବା ପରେ ସେମାନଙ୍କୁ ପ୍ରଥମେ ବଇଁଚା ସ୍ୱାସ୍ଥ୍ୟକେନ୍ଦ୍ର ପରେ ବାସୁଦେବୁପୁର ସ୍ୱାସ୍ଥ୍ୟ କେନ୍ଦ୍ରକୁ ୧୦୮ ଆମ୍ବୁଲାନ୍ସ ଯୋଗେ ପଠାଯାଇଥିଲା। ସେଠାରେ ଡାକ୍ତର କୁମୁଦଙ୍କର ମୃତ୍ୟୁ ଘୋଷଣା କରିଥିବା ବେଳେ ଆହତ ହୋଇଥିବା ନିହାରକାଙ୍କୁ ଭଦ୍ରକ ଜିଲା ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ। ବର୍ତମାନ ନିହାରିକାଙ୍କ ଅବସ୍ଥା ଉଦବେଗଜନକ ଥିବା ଜଣାଯାଇଛି।
Comments are closed.