ମୋଦୀଙ୍କ ପାଦ ଛୁଇଁଲେ ପାପୁଆ ନିୟୁ ଗିନିର ପ୍ରଧାନମନ୍ତ୍ରୀ

ପୋର୍ଟ ମୋର୍ସବାଏ : ତ୍ରିରାଷ୍ଟ୍ରୀୟ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ପାପୁଆ ନିୟୁ ଗିନିରେ ପହଞ୍ଚିଛନ୍ତି। ପପୁଆ ନିୟୁ ଗିନିରେ ମୋଦୀଙ୍କୁ ଭବ୍ୟ ସ୍ବାଗତ କରାଯାଇଛି। ପପୁଆ ନିୟୁ ଗିନିର ପ୍ରଧାନମନ୍ତ୍ରୀ ଜେମ୍‌ସ ମାରାପେ ବିମାନବନ୍ଦରରେ ଉପସ୍ଥିତ ରହି ମୋଦୀଙ୍କୁ ସ୍ବାଗତ କରିଥିଲେ। ଏପରିକି ମୋଦୀଙ୍କୁ ସ୍ବାଗତ କରିବା ସମୟରେ ମାରାପେ ତାଙ୍କ ପାଦ ଛୁଇଁଥିଲେ। ମାତ୍ର ମୋଦୀ ମାରାପେଙ୍କୁ ଉଠାଇ ଆଲିଙ୍ଗନ କରିଥିଲେ। ପରେ ମାରାପେ ତାଙ୍କ ଦେଶର ପ୍ରମୁଖ ଅଧିକାରୀଙ୍କୁ ମୋଦୀଙ୍କ ସହିତ ପରିଚିତ କରାଇଥିଲେ। ଭାରତର ଜଣେ ପ୍ରଧାନମନ୍ତ୍ରୀ ଭାବେ ମୋଦୀଙ୍କ ପାପୁଆ ନିୟୁ ଗିନି ଗସ୍ତ ପ୍ରଥମ ଘଟଣା। ପୂର୍ବରୁ ଭାରତର କୌଣସି ପ୍ରଧାନମନ୍ତ୍ରୀ ପାପୁଆ ନିୟୁ ଗିନି ଗସ୍ତ କରି ନାହାନ୍ତି। ପାପୁଆ ନିୟୁ ଗିନିରେ ମୋଦୀ ଭାରତ-ପ୍ରଶାନ୍ତ ମହସାଗରୀୟ ଦ୍ବୀପ ରାଷ୍ଟ୍ର ସମନ୍ବୟ ଫୋରମ୍ (ଏଫ୍‌ଆଇପିଆଇସି)ର ତୃତୀୟ ସମ୍ମିଳନୀରେ ଯୋଗ ଦେବେ। ଏହି ସମ୍ମିଳନୀରେ ୧୪ଟି ଦ୍ବୀପ ରାଷ୍ଟ୍ର ଯୋଗ ଦେବେ।

Never before seen visuals:
Papua New Guinea PM touches the feet of PM @narendramodi as he lands in the country for a historic visit!@PMOIndia pic.twitter.com/1F1MMrAknD

— DD News (@DDNewslive) May 21, 2023

ପାପୁଆ ନିୟୁ ଗିନି ଗସ୍ତ ପୂର୍ବରୁ ମୋଦୀ ଜାପାନ ହିରୋସୀମାରେ ଆୟୋଜିତ ଜି-୭ ରାଷ୍ଟ୍ର ସମ୍ମିଳନୀରେ ଯୋଗ ଦେ‌ଇଥିଲେ। ସମ୍ମିଳନୀକୁ ସମ୍ବୋଧନ ଅବସରରେ ସେ ଚୀନର ବିସ୍ତାରବାଦ ନୀତିକୁ ସମାଲୋଚନା କରିଥିଲେ। ସେ କହିଥିଲେ ଯେ ୟୁକ୍ରେନରେ ଯେଉଁ ସଂକଟ ଦେଖାଯାଇଛି ତାହା ହେଉଛି ଏକ ମାନବିକ ସଂକଟ । ମାନବିକ ମୂଲ୍ୟବୋଧକୁ ନେଇ କୌଣସି ପ୍ରକାର ରାଜନୀତି ହେବା ଉଚିତ ନୁହେଁ। କ୍ଷମତା ଓ ଅର୍ଥନୀତିକୁ ନେଇ ରାଜନୀତି ହେବା ଦରକାର। ୟୁକ୍ରେନରେ ଯେଉଁ ସଂକଟ ଦେଖାଯାଇଛି ତାକୁ କଥାବାର୍ତ୍ତା ଓ କୂଟନୀତି ମାଧ୍ୟମରେ ହିଁ ସମାଧାନ କରାଯାଇପାରିବ। ସେ କହିଛନ୍ତି ଯେ ଜାତିସଂଘ ଚାର୍ଟର, ଆନ୍ତର୍ଜାତିକ ଆଇନ ଏବଂ ସାର୍ବଭୌମତ୍ବ ଓ ଆଞ୍ଚଳିକ ସଂହତିକୁ ସବୁ ରାଷ୍ଟ୍ର ସମ୍ମାନ ଜଣାଇବା ଦରକାର। କୌଣସି ପ୍ରସଙ୍ଗରେ ଏକପାକ୍ଷିଆ ନିଷ୍ପତ୍ତି ପରିବର୍ତ୍ତେ ସମ୍ମିଳୀତ ନିଷ୍ପତ୍ତି ନିଆଯିବା ଦରକାର । ଭାରତର ପୂର୍ବ ଲଦାଖରେ ଚୀନ ସହିତ ଲାଗି ରହିଥିବା ସୀମା ବିବାଦ ଓ ୟୁକ୍ରେନ ଉପରେ ରୁଷ୍‌ର ଆକ୍ରମଣକୁ ନେଇ ମୋଦୀ ଏପରି କହିଥିଲେ । ଶନିବାର ମୋଦୀ ଜି-୭ ସମିଳନୀ ଅବସରରେ ଆମେରିକା ରାଷ୍ଟ୍ରପତି ଜୋ ବାଇଡେନ ଓ ୟୁକ୍ରେନ ରାଷ୍ଟ୍ରପତି ଭୋଲଡୋମିର ଜେଲେନସ୍କିଙ୍କୁ ସାକ୍ଷାତ କରିଥିଲେ। ସାକ୍ଷାତ ସମୟରେ ମୋଦୀଙ୍କୁ ବାଇଡେନ ତାଙ୍କର ଅଟୋଗ୍ରାଫ୍‌ ମାଗିଥିଲେ।