ସୂର୍ଯ୍ୟଙ୍କ ଶତକ, ଗୁଜରାଟ ବିପକ୍ଷରେ ମୁମ୍ବଇର ପ୍ରତିଶୋଧ
ରସିଦ୍ଙ୍କ ଅଲରାଉଣ୍ଡ ପ୍ରଦର୍ଶନ ନିଷ୍ଫଳ
ମୁମ୍ବଇ : ସୂର୍ଯ୍ୟକୁମାର ଯାଦବଙ୍କ ଅପରାଜିତ ଶତକ ପରେ ବୋଲରଙ୍କ ମିଳିତ ସଫଳତା ବଳରେ ମୁମ୍ବଇ ଇଣ୍ଡିଆନ୍ସ ଚଳିତ ଆଇପିଏଲରେ ସପ୍ତମ ବିଜୟ ହାସଲ କରିଛି। ଶୁକ୍ରବାର ୱାଙ୍ଖଡେ ଷ୍ଟାଡ଼ିୟମରେ ଖେଳାଯାଇଥିବା ୫୭ତମ ମ୍ୟାଚରେ ମୁମ୍ବଇ ଇଣ୍ଡିଆନ୍ସ ୨୭ ରନରେ ଗୁଜରାଟ ଟାଇଟାନ୍ସକୁ ପରାସ୍ତ କରିଛି। ମୁମ୍ବଇ ଏହି ବିଜୟ ସହ ଟାଇଟାନ୍ସ ବିପକ୍ଷରେ ପ୍ରଥମ ଚରଣ ମ୍ୟାଚ ପରାଜୟର ପ୍ରତିଶୋଧ ନେଇଛି। ମୁମ୍ବଇ ଇଣ୍ଡିଆନ୍ସ ୧୨ଟି ମ୍ୟାଚରୁ ୭ଟି ବିଜୟ ସହ ଟେବୁଲର ୩ୟ ସ୍ଥାନକୁ ଫେରିଛି। ଅନ୍ୟପକ୍ଷରେ ଗୁଜରାଟ ଟାଇଟାନ୍ସ ପରାଜୟ ସତ୍ତ୍ବେ ଟେବୁଲର ଶୀର୍ଷ ସ୍ଥାନ ବଜାୟ ରଖିଛି।
ସୂର୍ଯ୍ୟକୁମାର ଯାଦବଙ୍କ ଅପରାଜିତ ଶତକ ୧୦୩ରନ ବଳରେ ମୁମ୍ବଇ ଇଣ୍ଡିଆନ୍ସ ୨୧୮ରନ କରିଥିଲା। ଜବାବରେ ଗୁଜରାଟ ଟାଇଟାନ୍ସ ରସିଦ ଖାନଙ୍କ ବିସ୍ଫୋରକ ୭୯ରନ ସତ୍ତ୍ବେ ୧୯୧ରନ କରିବାକୁ ସକ୍ଷମ ହୋଇଥିଲା।
୨୧୯ରନର ବିଶାଳ ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଗୁଜରାଟ ଟାଇଟାନ୍ସ ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଦଳ ୨୬ରନ ମଧ୍ୟରେ ୩ଟି ୱିକେଟ ହରାଇଥିଲା। ରିଦ୍ଧିମାନ ସାହ ୨, ଶୁବମାନ ଗିଲ୍ ୬ ଓ ହାର୍ଦିକ ପାଣ୍ଡ୍ୟା ୪ରନ କରି ଆଉଟ୍ ହୋଇଥିଲେ। ୪ର୍ଥ ୱିକେଟ ପାଇଁ ବିଜୟ ଶଙ୍କର ଓ ଡେଭିଡ୍ ମିଲର ୨୨ରନ ସଂଗ୍ରହ କରିଥିଲେ। ୪୮ରନ ସ୍କୋର ଥିବାବେଳେ ବିଜୟ ଶଙ୍କର ୨୯ରନ କରି ଆଉଟ୍ ହୋଇଥିଲେ। ୫୫ରରେ ପଞ୍ଚମ ୱିକେଟର ପତନ ଘଟିଥିଲା। ଅଭିନବ ମନୋହର ୨ରନ କରି ଆଉଟ୍ ହୋଇଥିଲେ। ୬ଷ୍ଠ ୱିକେଟରେ ମିଲର ଓ ରାହୁଲ ତିୱାତିଆ କିଛି ସମୟ ତିଷ୍ଠି ରହିବା ସହିତ ସ୍କୋରକୁ ୧୦୦ରେ ପହଞ୍ଚାଇଥିଲେ। ମିଲର ୪୧ରନ କରି ଆଉଟ୍ ହୋଇଥିେଲ। ଶେଷ ଆଡକୁ ରସିଦ ଖାନଙ୍କ ୩୨ଟି ବଲରୁ ୧୦ଟି ଛକା ଓ ୩ଟି ଚୌକା ସହ ଅପରାଜିତ ୭୯ରନ ବଳରେ ଦଳ ୮ ୱିକେଟ ହରାଇ ୧୯୧ରନ କରିବାକୁ ସକ୍ଷମ ହୋଇଥିଲା।
ମୁମ୍ବଇ ପକ୍ଷରୁ ଆକାଶ ମାଧୱାଲ ୩ଟି, କୁମାର କାର୍ତ୍ତିକେୟ ଓ ପିୟୁଷ ଚାୱାଲା ପ୍ରତ୍ୟେକ ଦୁଇଟି ଲେଖାଏଁ ୱିକେଟ ନେଇଛନ୍ତି।
ଗୁଜରାଟ ଟାଇଟାନ୍ସ ଟସ୍ ଜିତି ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ବ୍ୟାଟିଂ ଆମନ୍ତ୍ରଣ ପାଇଥିବା ମୁମ୍ବଇ ଇଣ୍ଡିଆନ୍ସର ଦୁଇ ଓପନର ଅଧିନାୟକ ରୋହିତ ଶର୍ମା ଓ ଇଶାନ କିଷନ ଦୃଢତାର ସହିତ ଇନିଂସ ଆରମ୍ଭ କରିଥିଲେ। ଉଭୟେ ୬ ଓଭର ପାୱାର ପ୍ଲେ ରୁ ୬୧ରନ ସଂଗ୍ରହ କରିଥିଲେ। ୬ରନ ବ୍ୟବଧାନରେ ଦୁଇ ଓପନର ୱିକେଟ ହରାଇଥିଲେ। ଇନିଂସର ସପ୍ତମ ଓଭରରେ ରସିଦ୍ ଖାନ ରୋହିତ ଓ ଇଶାନ କିଷନଙ୍କୁ ଆଉଟ୍ କରି ଗୁଜରାଟକୁ ପ୍ରତ୍ୟାବର୍ତ୍ତନ ସୁଯୋଗ ଦେଇଥିଲେ। ରୋହିତ ୨୯ ଓ ଇଶାନ ୩୧ରନ କରି ଆଉଟ୍ ହୋଇଥିଲେ। ୩ୟ ୱିକେଟରେ ସୂଯ୍ୟକୁମାର ଯାଦବ ଓ ନିହାଲ ୱାଧେରା ୨୨ରନ ଯୋଡିଥିଲେ। ସ୍କୋର ୮୮ରନ ଥିବାବେଳେ ୱାଧେରା ୧୫ରନ କରି ଆଉଟ୍ ହୋଇଥିଲେ। ୪ର୍ଥ ୱିକେଟରେ ସୂର୍ଯ୍ୟକୁମାର ଓ ବିଷ୍ଣୁ ବିନୋଦ ୬୫ରନ ସଂଗ୍ରହ କରିଥିଲେ। ସ୍କୋର ୧୫୩ ଥିବାବେଳେ ବିଷ୍ଣୁ ବିନୋଦ ୩୦ରନ କରି ଆଉଟ୍ ହୋଇଥିଲେ। ଟିମ୍ ଡେଭିଡ୍ ମାତ୍ର ୫ରନ କରି ଆଉଟ୍ ହୋଇଥିଲେ। ଶେଷ ଆଡକୁ ସୂର୍ଯ୍ୟକୁମାର ଯାଦବଙ୍କ ବିସ୍ପୋରକ ବ୍ୟାଟିଂ ବଳରେ ଦଳ ୫ ୱିକେଟ ହରାଇ ୨୧୮ରନ କରିଥିଲା। ସୂର୍ଯ୍ୟକୁମାର ୪୯ଟି ବଲରୁ ୧୧ଟି ଚୌକା ଓ ୬ଟି ଛକା ସହ ୧୦୩ ଓ କାମେରୁନ ଗ୍ରୀନ ୩ରନ କରି ଅପରାଜିତ ରହିଥିଲେ। ଗୁଜରାଟ ଟାଇଟାନ୍ସ ପକ୍ଷରୁ ରସିଦ ଖାନ ୪ଟି ଓ ମୋହିତ ଶର୍ମା ଗୋଟିଏ ୱିକେଟ ନେଇଥିଲେ।
Comments are closed.