ପିପିଲି: ପିପିଲି ପୁଲିସ ଜଣେ ରାଜପଥ ଲୁଟେରାକୁ ଗିରଫ କରିବାରେ ସଫଳ ହୋଇଥିବା ବେଳେ ତା’ ନିକଟରୁ ୬ଟି ମୋବାଇଲ ଫୋନ୍ ଓ ଗୋଟିଏ ଚୋରି ହୋଣ୍ଡା ସାଇନ୍ ବାଇକ୍କୁ ଜବତ କରିଛି। ଗିରଫ ଅଭିଯୁକ୍ତର ନାମ ସତ୍ୟରଞ୍ଜନ ଭୋଇ ଓରଫ ମନ୍ତ୍ରୀ (୨୯) ଓ ତା’ ଘର କୌଶଲ୍ୟାଗଙ୍ଗ ଫାଣ୍ଡି ଅନ୍ତର୍ଗତ ପୁବା ତୋଟାସାହିରେ ହୋଇଥିବା ସୂଚନା ମିଳିଛି।
ଗତ ୧ ତାରିଖ ଅପରାହ୍ନ ସାଢେ ୪ଟା ସମୟରେ ନହଳାପଡ଼ା ଗ୍ରାମର ନୃସିଂହ ପ୍ରଧାନ କୌଶଲ୍ୟାଗଙ୍ଗ ଅନ୍ତର୍ଗତ ସିଫା ନିକଟରେ ମୋବାଇଲ୍ରେ କଥା ହେଉଥିବା ସମୟରେ ଅଭିଯୁକ୍ତ ସତ୍ୟରଞ୍ଜନ ଏକ ବାଇକ୍ରେ ଆସି ତାଙ୍କୁ ଆକ୍ରମଣ କରିବା ସହ ମୋବାଇଲ୍କୁ ଛଡାଇ ନେଇ ଫେରାର ହୋଇଯାଇଥିଲା। ଏନେଇ ନୃସିଂହ ପିପିଲି ଥାନାରେ ଲିଖିତ ଅଭିଯୋଗ କରିଥିଲେ। ପିପିଲି ଆଇଆଇସି ଅଭିମନ୍ୟୁ ନାୟକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କୌଶଲ୍ୟାଗଙ୍ଗ ଫାଣ୍ଡି ଅଧିକାରୀ ସୌମ୍ୟରଞ୍ଜନ ଜେନା ସଦଳ ବଳେ ବିଭିନ୍ନ ସ୍ଥାନରେ ଚଢାଉ କରି ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଥିଲେ। ତା’ ନିକଟରୁ ଲୁଟ୍ ମୋବାଇଲ ଫୋନ୍ ସମେତ ମୋଟ୍ ୬ଟି ମୋବାଇଲ୍ ଫୋନ୍ ଓ ଗୋଟିଏ ଚୋରି ହୋଣ୍ଡା ସାଇନ୍ ବାଇକ୍କୁ ପୁଲିସ ଜବତ କରିଛି। ଅନ୍ୟ କେଉଁ କେଉଁ ଅପରାଧରେ ଅଭିଯୁକ୍ତ ସଂପୃକ୍ତ ଅଛି ସେ ନେଇ ତଦନ୍ତ ଜାରି ରହିଥିବା ପୁଲିସ ସୂଚନା ଦେଇଛି।
