ଗୁରୁଡିଝାଟିଆ: ଭଲ ମଣିଷ ସଂଖ୍ୟା ସମାଜରୁ ଦିନକୁ ଦିନ କମିବାରେ ଲାଗିଛି। ଅଧିକ ଶିକ୍ଷିତ ହେଉଛନ୍ତି କିନ୍ତୁ ସଂସ୍କାର ସଂସ୍କୃତି,ଆଚାର ବ୍ୟବହାର, ମଣିଷପଣିଆ ର ଭାବ ଶିକ୍ଷାରେ ପ୍ରସ୍ପୁଟିତ ହେଉନାହିଁ। ଯାହାଫଳରେ ସମାଜର ସ୍ଖଳନ ଦେଖାଯାଇଛି। ଏସବୁ ଉଦ୍ଧ୍ୱର୍ରେ ରହି ସମାଜକୁ ଠିକଣା ବାଟ ଦେଖାଇବାରେ ସରସ୍ୱତୀ ଶିଶୁବିଦ୍ୟା ମନ୍ଦିରର ଭୂମିକା ଦର୍ପଣ ସଦୃଶ। ଭଲ ଓ ବଡ ମଣିଷ ହେବା ସହ ମାନବିକ ମୂଲ୍ୟବୋଧ ଓ ଦେଶ ପ୍ରୀତିର ଭାବ ପ୍ରତିପାଦିତ କରୁଥିବାରୁ ଅନ୍ୟ ଶିକ୍ଷାନୁଷ୍ଠାନ ଠାରୁ ସରସ୍ୱତୀ ଶିଶୁବିଦ୍ୟା ମନ୍ଦିରର ବିଦ୍ୟାର୍ଥୀମାନେ ସ୍ୱତନ୍ତ୍ର ବୋଲି ଗୁରୁଡିଝାଟିଆସ୍ଥିତ ସରସ୍ୱତୀ ଶିଶୁବିଦ୍ୟା ମନ୍ଦିରର ୨୨ତମ ବାର୍ଷିକ ଉତ୍ସବରେ ଯୁବ ସଂଗଠକ ତଥା ସମାଜସେବୀ
ଗିରୀଶ ନାଥ ମିଶ୍ର ମୁଖ୍ୟ ଅତିଥି ଭାବରେ ଯୋଗଦେଇ ମତପ୍ରକାଶ କରିବା ସହ କୃତୀ ବିଦ୍ୟାର୍ଥୀମାନଙ୍କୁ ସମ୍ବର୍ଦ୍ଧିତ କରିଥିଲେ। ବିଦ୍ୟାଳୟ ପରିଚାଳନା କମିଟିର ସଭାପତି ଅମୀୟ କୁମାର ସାହୁଙ୍କ ଅଧ୍ୟକ୍ଷତାରେ ଆଜି ସନ୍ଧ୍ୟାରେ ଆୟୋଜିତ ବାର୍ଷିକ ଉତ୍ସବରେ ବିଦ୍ୟାଳୟ ପରିଚାଳନା କମିଟି ଉପସଭାପତି ଦେବେନ୍ଦ୍ର ସାହୁ, ସଞ୍ଜୟ କୁମାର ଦଳାଇ, ଗଦାଧର ବେହେରା, ପ୍ରଶାନ୍ତ କୁମାର ରାଉତ, ରଶ୍ମୀତା ମହାରଣା, ରାସବିହାରୀ ମହାପାତ୍ର ପ୍ରମୁଖ ଅତିଥିଭାବରେ ଯୋଗଦେଇ ଦେଶ ଓ ଦଶର ନାମ ରଖିବା ପାଇଁ କହିଥିଲେ। ବିଦ୍ୟାଳୟର ପ୍ରଧାନଆଚାର୍ୟ୍ୟ ପ୍ରଶାନ୍ତ ଦାଶ ଙ୍କ ସଂଯୋଜନାରେ ଆୟୋଜିତ ଏହି ଉତ୍ସବରେ ପରିଚାଳନା କମିଟିର ସଂପାଦକ ସମୀର କୁମାର ସାହୁ ଅତିଥି ପରିଚୟ ଓ ସ୍ୱାଗତ ଭାଷଣ ପ୍ରଦାନ କରିଥିଲେ।ବିଦ୍ୟାର୍ଥୀମାନଙ୍କ ଦ୍ୱାରା ସାଂସ୍କୃତିକ କାର୍ୟ୍ୟକ୍ରମ ଅନୁଷ୍ଠିତ ହୋଇଥିଲା।
