ଭୁବନେଶ୍ବର: ଚଳିତବର୍ଷ ମାର୍ଚ୍ଚ ସୁଦ୍ଧା ଖଦି ଉତ୍ପାଦନ, ସୂତାକଟା, ଲୁଗାବୁଣା ଓ ବିକ୍ରି ଆଶାନୁରୂପ ହୋଇଛି। କେବଳ ଭୁବନେଶ୍ବର ବିକ୍ରି କେନ୍ଦ୍ର (ଖଦି ଇଣ୍ଡିଆ) ଏକକୋଟିରୁ ଊର୍ଦ୍ଧ୍ବ ଟଙ୍କାର ଖଦି ସାମଗ୍ରୀ ବିକ୍ରି କରିଛି। ଆଗାମୀ ଦିନରେ ଉତ୍ପାଦନ ଓ ବିକ୍ରି ବୃଦ୍ଧି କରାଯିବ ବୋଲି ଗୋପବନ୍ଧୁ ଦରିଦ୍ର ନାରାୟଣ ସେବା ସଂଘର ବୈଠକରୁ ସୂଚନା ମିଳିଛି।
ଗୋପବନ୍ଧୁ ଦରିଦ୍ର ନାରାୟଣ ସେବା ସଂଘର ସଭାପତି ଏବଂ ‘ସମାଜ’ର ସମ୍ପାଦକ ନିରଞ୍ଜନ ରଥଙ୍କ ସଭାପତିତ୍ବରେ ଏକ ବୈଠକ ଗତ ୧୨ ତାରିଖରେ ଖାରବେଳନଗରସ୍ଥିତ ଗୋପବନ୍ଧୁ ସଦନେର ଅନୁଷ୍ଠିତ ହୋଇଥିଲା। ଏଥିରେ ଅନ୍ୟ ସଦସ୍ୟଙ୍କ ମଧ୍ୟରେ ପୂର୍ବତନ ପୁଲିସ ଆଇଜି ବଟକୃଷ୍ଣ ତ୍ରିପାଠୀ, ଅବସରପ୍ରାପ୍ତ ଆଇଏଏସ ଗୋସ୍ବାମୀ ଗୋଲାମ ଦେବତା, ଜ୍ଞାନ ରଥ, ଅଶୋକ ପଟ୍ଟନାୟକ, ଡ. ଦେବାଶିଷ ମିଶ୍ର, ଶ୍ରୀଧର ପୃଷ୍ଟି, କୌଶଲ୍ୟା ଦାଶ ଏବଂ ସମ୍ପାଦକ ପ୍ରମୋଦ କୁମାର ମହାନ୍ତି ଉପସ୍ଥିତ ଥିଲେ।
ସଭାପତି ଶ୍ରୀ ରଥ ପ୍ରକାଶ କରିଥିଲେ ଯେ ଚଳିତ ମାସରେ କାଦୁଆ ଆଶ୍ରମରେ ତେଲଘଣା ସ୍ଥାପନ କରାଯିବ। ଏହାଦ୍ବାରା ଅଞ୍ଚଳବାସୀ ଉପକୃତ ହେବେ। ମୋତିଦେବୀ ପାଠାଗାରରେ ସ୍ଥାନୀୟ ବିଦ୍ୟାଳୟର ଛାତ୍ରଛାତ୍ରୀଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯିବ। ଖଦି ବିକାଶ ଯୋଜନା ମାଧ୍ୟମରେ ସଂଘର କାର୍ଯ୍ୟକ୍ରମକୁ ସମ୍ପ୍ରସାରିତ କରାଯିବ ବୋଲି ଶ୍ରୀ ରଥ କହିଥିଲେ। ଚଳିତ ମାସରେ ପୁରୀ ଖଦି ଇଣ୍ଡିଆର ଶୋ’ରୁମ୍ ନବୀକରଣ ସହ ଖୋଲିବ। କାଦୁଆ ଆଶ୍ରମରେ ମଧ୍ୟ ଢିଙ୍କିକୁଟା ଚୁଡ଼ା ପ୍ରସ୍ତୁତ କରାଯିବ।
