ପିପିଲି: ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ସ୍ମୃତିରକ୍ଷା ଉଦ୍ଦେଶ୍ୟରେ ରାଜ୍ୟ ସରକାରଙ୍କ ପକ୍ଷରୁ ଗୋପବନ୍ଧୁଙ୍କ ଜନ୍ମପୀଠ ସୁଆଣ୍ଡୋ ଗ୍ରାମରେ ଅନେକ ଉନ୍ନତିମୂଳକ କାର୍ଯ୍ୟ ସହ ଏକ ସଂଗ୍ରହାଳୟ କରାଯାଇଛି। ବିଳମ୍ବରେ ହେଲେ ମଧ୍ୟ ଏହା ଏକ ସ୍ୱାଗତଯୋଗ୍ୟ ପଦକ୍ଷେପ। ଗୋପବନ୍ଧୁଙ୍କ ତ୍ୟାଗ ଓ ସମାଜସେବାର ପଟାନ୍ତର ନାହିଁ। ଗୋପବନ୍ଧୁ ଥିଲେ ଯୁଗପୁରୁଷ। ତାଙ୍କ ଜନ୍ମସ୍ଥାନ ଏକ ତୀର୍ଥକ୍ଷେତ୍ର। ତେବେ ସୁଆଣ୍ଡୋଠାରେ ଖଣ୍ଡୋଲାଇଟ୍ ପଥରରେ ନିର୍ମତ ୬ବଖରା ବିଶିଷ୍ଟ ଏହି ସଂଗ୍ରହାଳୟ ପରିଦର୍ଶନ ପାଇଁ ରାଜ୍ୟ ସରକାରଙ୍କ ପକ୍ଷରୁ ଶୁଳ୍କ ଧାର୍ଯ୍ୟ କରାଯାଇଛି। ୧୨ବର୍ଷ ପର୍ଯ୍ୟନ୍ତ ଶିଶୁ, ଛାତ୍ରଛାତ୍ରୀ ପ୍ରମାଣପତ୍ର ସହିତ ଏବଂ ଦିବ୍ୟାଙ୍ଗ, ଚିତ୍ରଶିଳ୍ପୀ ଓ ବୁଣାକାରଙ୍କୁ ସଂପୂର୍ଣ୍ଣ ଶୁଳ୍କ ଛାଡ କରାଯାଇଥିବା ବେଳେ ଅନ୍ୟମାନଙ୍କ ପାଇଁ ୧୦ଟଙ୍କା ଶୁଳ୍କ ଲାଗୁ କରାଯାଇଛି। ତେବେ, ସରକାରଙ୍କ ଏହି ନିଷ୍ପତ୍ତିକୁ ଅଗ୍ରଣୀ ନାଗରିକ ସଂଗଠନ ‘ଜନସ୍ୱାର୍ଥ ସୁରକ୍ଷା ସମିତି’ ପକ୍ଷରୁ ଦୃଢ ବିରୋଧ କରାଯାଇଛି। ଏହି ତୀର୍ଥଭୂମି ତଥା ଗୋପବନ୍ଧୁଙ୍କ ଜନ୍ମସ୍ଥାନ ସୁଆଣ୍ଡୋ ସ୍ଥିତ ସଂଗ୍ରହାଳୟ ପରିଦର୍ଶନ କରିବାକୁ ଆସୁଥିବା ଜନସାଧାରଣଙ୍କ ପାଇଁ ସଂପୂର୍ଣ୍ଣ ଶୁଳ୍କ ଛାଡ କରିବାକୁ ‘ଜନସ୍ୱାର୍ଥ ସୁରକ୍ଷା ସମିତି’ ପକ୍ଷରୁ ମୁଖ୍ୟ ସଂଯୋଜକ ସନ୍ତୋଷ କୁମାର ମିଶ୍ର ସରକାରଙ୍କଠାରେ ଦାବି କରିଛନ୍ତି।
Comments are closed.