ନୂଆଦିଲ୍ଲୀ : ଅଦାଲତରେ ମାମଲା ପରିଚାଳନାର ଭାଷା ଇଂରାଜୀ ବୋଲି ଶୁକ୍ରବାର ସୁପ୍ରିମକୋର୍ଟଙ୍କ ପୀଠ କହିଛନ୍ତି। ଶୁକ୍ରବାର ସୁପ୍ରିମକୋର୍ଟରେ ଏକ ମାମଲାର ଶୁଣାଣି ସମୟରେ ଶଙ୍କର ଲାଲ ଶର୍ମା ନାମକ ଜଣେ ବୟସ୍କ ବ୍ୟକ୍ତି ବିନା ଆଇନଜୀବୀରେ ନିଜେ ଯୁକ୍ତି ଉପସ୍ଥାପନ କରିଥିଲେ। ସୁପ୍ରିମକୋର୍ଟର ବିଚାରପତି କେଏମ ଜୋସେଫ୍ ଓ ବିଚାରପତି ହୃଷିକେଶ ରାୟଙ୍କ ପୀଠ ସମ୍ମୁଖରେ ଶଙ୍କର ଲାଲ ହିନ୍ଦୀରେ ଯୁକ୍ତି ଉପସ୍ଥାପନ କରିଥିଲେ। ତେବେ ବିଚାରପତି କେଏମ୍ ଜୋସେଫ ଇଂରାଜୀରେ କହିଥିଲେ ଆପଣ ହିନ୍ଦୀରେ କ’ଣ କହୁଛନ୍ତି ତାହା ଆମେ ବୁଝି ପାରୁନାହିଁ। ଆମେ ଇଂରାଜୀରେ ଯାହା କହୁଛୁ ଆପଣ ବୁଝି ପାରୁ ନାହାନ୍ତି। ଅଦାଲତର ଭାଷା ଇଂରାଜୀ ହୋଇଥିବାରୁ ଯଦି ଆପଣ ଚାହିଁବେ ତେବେ ଆମେ ଆପଣଙ୍କ ପାଇଁ ଜଣେ ଆଇନଜୀବୀଙ୍କ ବ୍ୟବସ୍ଥା କରିଦେବୁ।
ନିକଟରେ ଥିବା ଏକ ଅଦାଲତ ପ୍ରକୋଷ୍ଠରେ ଉପସ୍ଥିତ ଥିବା ଅତିରିକ୍ତ ସଲିସିଲଟର ଜେନେରାଲ ମାଧବୀ ଦିବାନ୍ଙ୍କ ନିକଟରେ ଏହି ଖବର ପହଞ୍ଚିବା କ୍ଷଣି ସେ ବିଚାରପତି କେଏମ ଜୋସେଫ୍ ଓ ହୃଷିକେଶ ରାୟଙ୍କ ଅଦାଲତକୁ ଆସି ପୀଠ ଯାହା କହୁଛନ୍ତି ତାହାକୁ ହିନ୍ଦୀରେ ଅନୁବାଦ କରି ଶଙ୍କର ଲାଲଙ୍କୁ ବୁଝାଇ ଦେଇଥିଲେ। ପରବର୍ତ୍ତୀ ସମୟରେ ମାଧବୀ ପୀଠକୁ ଜଣାଇଥିଲେ ମାମଲା ପରିଚାଳନା ପାଇଁ ଆଇନଜୀବୀଙ୍କ ସହାୟତା ନେବାକୁ ଶଙ୍କର ଲାଲ ରାଜି ଅଛନ୍ତି। ଏହା ଶୁଣିବା ପରେ ଶଙ୍କର ଲାଲଙ୍କ ନିକଟରେ ବସିଥିବା ଜଣେ ଆଇନଜୀବୀଙ୍କୁ ପୀଠ ମାମଲା ପରିଚାଳନା କରିବାକୁ ରାଜି ଅଛନ୍ତି କି ବୋଲି ପ୍ରଶ୍ନ କରିଥିଲେ। ସଂପୃକ୍ତ ଆଇନଜୀବୀ ଜଣକ ମାମଲା ପରିଚାଳନା ପାଇଁ ରାଜି ଥିବା ପୀଠକୁ ଜଣାଇଥିଲେ। ଆଇନଜୀବୀ ଜଣଙ୍କୁ ପୀଠ କହିଥିଲେ ଆଶା କରୁଛି ଆପଣ ବିନା ପାରିଶ୍ରମିକରେ ଏହି ମାମଲା ପରିଚାଳନା କରିବେ। ଆଇନଜୀବୀ ପ୍ରତ୍ୟୁତ୍ତରରେ କହିଥିଲେ ସେ ବିନା ପାରିଶ୍ରମିକରେ ମାମଲା ପରିଚାଳନା ପାଇଁ ରାଜି ଅଛନ୍ତି। ପୀଠ ମାମଲାର ପରବର୍ତ୍ତୀ ଶୁଣାଣି ପାଇଁ ଡିସେମ୍ବର ୪କୁ ଦିନଧାର୍ଯ୍ୟ କରିଥିଲେ।
Comments are closed.