ପାଟଣାଗଡ: ଉପଖଣ୍ଡର ବେଲପଡା ଅନ୍ତର୍ଗତ ଜୁହ୍ନା ବନ୍ଧରୁ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ ଯୁବକ ଜଣକ ବେଲପଡା ବ୍ଲକ ଅନ୍ତର୍ଗତ ଖଲିପଥର ଗ୍ରାମର କ୍ଷୀରସିନ୍ଧୁ ନାଏକ ବୋଲି ଜଣାପଡିଛି । ସୂଚନା ଅନୁଯାୟୀ, ବେଲପଡାର ଜୁହ୍ନା ବନ୍ଧରେ ଜଣେ ଯୁବକଙ୍କ ମୃତଦେହ ଭାସୁଥିବା ଦେଖି କିଛି ସ୍ଥାନୀୟ ଲୋକ ବେଲପଡା ପୁଲିସକୁ ଖବର ଦେଇଥିଲେ । ପୁଲିସ ମୃତଦେହକୁ ଉଦ୍ଧାର କରିଥିଲା ।
ଯୁବକ ଜଣକ ଖଲିପଥର ଗ୍ରାମର ଛବି ନାଏକଙ୍କ ପୁଅ କ୍ଷୀରସିନ୍ଧୁ ବୋଲି ପୁଲିସ ଜାଣିବାକୁ ପାଇଥିଲା । ପରେ ପୁଲିସ ଛବିଙ୍କ ପରିବାରକୁ ଥାନାକୁ ଡକାଇ ମୃତଦେହକୁ ଚିହ୍ନଟ କରାଇଥିଲା । ଗତ ରବିବାର ଠାରୁ କ୍ଷୀରସିନ୍ଧୁ ନିଖୋଜ ଥିଲା । ତେବେ ପରିବାର ବର୍ଗ ଏ ସଂପର୍କରେ ଥାନାରେ ଅଭିଯୋଗ କରିନଥିଲେ । ଏ ସଂକ୍ରାନ୍ତରେ ବେଲପଡା ପୁଲିସ ଏକ ମାମଲା ରୁଜୁ କରିବା ସହ ଶବକୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଥିବା ଜଣାଯାଇଛି ।
