ଡେସ୍କ: ମହିଳାଙ୍କୁ ଜୀବନ୍ତ ଗିଳିଦେଲା ଅଜଗର, ଯାହାପରେ ସମଗ୍ର ଗାଁ ଆତଙ୍କିତ ହୋଇପଡିଛି। ସାମାଜିକ ଗଣମାଧ୍ୟରେ ଏହି ଘଟଣା ଦିନକୁ ଦିନ ଭାଇରାଲ ହେବାରେ ଲାଗିଛି। ବାସ୍ତବରେ ଇଣ୍ଡୋନେସିଆରେ ଘଟିଛି ଏହି ଲୋମହର୍ଷଣକାରୀ ଘଟଣା। ୨୨ ଫୁଟ ଲମ୍ବର ଏକ ଅଜଗର ଜଣେ ୫୪ ବର୍ଷୀୟା ମହିଳାଙ୍କୁ ଜୀବନ୍ତ ଗିଳି ଦେଇଛି, ଯାହା ସମସ୍ତଙ୍କ ପାଦ ତଳୁ ମାଟି ଖସାଇ ଦେଇଛି।
ସୂଚନା ଅନୁସାରେ, ୫୪ ବର୍ଷୀୟା ମହିଳା ରବର ସଂଗ୍ରହ କରିବାକୁ ଜଙ୍ଗଲକୁ ଯାଇ ଆଉ ଫେରି ନଥିଲେ। ଯେତେବେଳେ ସ୍ଥାନୀୟ ଲୋକେ ପ୍ରାୟ ଦୁଇ ଦିନ ଧରି ନିଖୋଜ ଥିବା ମହିଳାଙ୍କୁ ଖୋଜିବା ଆରମ୍ଭ କରିଥିଲେ, ସେତେବେଳେ ସେମାନେ ୨୨ ଫୁଟ ଲମ୍ବର ଏକ ଅଜଗର ଦେଖିଲେ, ଯାହାର କି ପେଟ ଫୁଲିଥିଲା। ସନ୍ଦେହ ହେବାରୁ ଅଜଗରର ପେଟ କଟାଯାଇଥିଲା। ଏହାପରେ ଅଜଗର ପେଟରୁ ସେମାନେ ମହିଳାଙ୍କ ଶରୀରର ଅଂଶବିଶେଷ ପାଇଥିଲେ, ଯାହାର ଫଟୋ ଏବଂ ଭିଡିଓ ଇଣ୍ଟରନେଟରେ ପବନ ପରି ଭାଇରାଲ ହେଉଛି। ଫଟୋ ଏବଂ ଭିଡିଓ ଦେଖିବା ପରେ ସୋସିଆଲ ମିଡିଆ ବ୍ୟବହାରକାରୀମାନେ ମଧ୍ୟ ଭୟଭୀତ ହୋଇ ଯାଇଛନ୍ତି।
ଏହାପୂର୍ବରୁ ୨୦୧୭ରେ ପଶ୍ଚିମ ସୁଲାୱେସୀ ଦ୍ୱୀପରେ ଏକ ଅଜଗର ଜଣେ ବ୍ୟକ୍ତିଙ୍କୁ ଜୀବନ୍ତ ଗିଳି ଦେଇଥିଲା ଓ ପରେ ଅଜଗର ପେଟ ଚିରି ତାଙ୍କ ମୃତଦେହ ବାହାର କରାଯାଇଥିଲା। ସୂଚନାଯୋଗ୍ୟ ଯେ, ଇଣ୍ଡୋନେସିଆ ଏବଂ ଦକ୍ଷିଣ ପୂର୍ବ ଏସିଆର ଅନ୍ୟାନ୍ୟ ଅଞ୍ଚଳରେ ବହୁ ସଂଖ୍ୟାରେ ଅଜଗର ଦେଖିବାକୁ ମିଳିଥାଏ। ଏହି ଅଜଗର ଶିକାରକୁ ପ୍ରଥମେ ନିଜର ତୀକ୍ଷ୍ଣ ବକ୍ର ଦାନ୍ତରେ ଧରିଥାନ୍ତି ଏବଂ ଏହାକୁ ପୁରା ଗିଳିବା ପୂର୍ବରୁ ଏହାକୁ ଶ୍ୱାସରୁଦ୍ଧ କରି ମାରିଦିଅନ୍ତି।
